كتب حنان محمد
الساعة ستة
الساعة ستة الصبح بدري
والدنيا بتفتح عينيها
تلاقي كل صبية حلوة جميلة
بتحضر الفطار بإيدها
والشمس طلّة من
شبابيك السحاب
والنهار بيختار توبه
الجديد من الدولاب
هي دي مصر بلدنا بكل
تفاصيلها الجميلة
هي دي مصر بلدنا
العظيمة والجليلة
نخلها بيمد لسابع أرض
وسنابل القمح تغني
وترقص على صوت الغنا
شتلة الورد
وعيدان النعناع لخضر
من جمالها هاين عليها تتكلم
يميل الفل ع الريحان
ويقول صباح الخير ويسلّم
مابين الأرض والأرض
لغة غير كل اللغات
حلوة عيونِك يا بلدي
ومحيرة الخواجات
نيلك الدرويش يفوت
ع البيوت ويسقي
الناس بدل المّيه شربات
منين ماتروح تلاقي الخير
والخير يقول أنا جاي
و إن أشتدّت العتمة
لا بد من ظهور الضي
بلاد ربنا كتير لكن
بلدنا ملهاش زي
تلاقي الإيد تشد الإيد
ومساعدة من قريب وبعيد
وتدق السعادة أبوابنا
من غير مواعيد
و اللقمة إن كانت شويه
بـ لمَّة الحبايب تزيد
