كتب حنان محمد
بابا هو احنا ليه مش أغنيا
ليه مش معانا فلوس كتير
نقدر نجيب كل الحاجات
كل اللعب والشكولاتات
ليه كل لبسى بتاع أخويا
وهدومه أصلا مش بتاعته
لأنى عمرى ماشوفتها كانت جديده
طب يعنى إيه كلمة يابابا على الحديده
ليه بس دايمًا تتخنق
لما بجيب سيرة الدروس
هو صحيح بتقولى حاضر
وبتبتسملى فى وقتها
وتقولى عايزك تبقى شاطر
وتحقق الأحلام كمان
اللى زمان انا سبتها
أما بخصوص الفلوس
معلش راح تصبر يومين
ليه كل مره تقول يومين
هو انت بتجبهم منين
ليه مش معاك من قبلها
ليه بس دايمًا مزنقوين
ليه كل حاجه بتبقى صعبه ف وقتها
وكمان عايزنى أكمل إلاحلام مكانك
هو إنت ليه اصلاً زمان
فرط فيها وسبتها
انا فاكر انك قولتلى
لو زاد علينا همنا
فى صلاتنا ندعى لربنا
طب لو دعيت
ليه ربنا مابيديناش
مش هو عارف إننا
فعلا يا بابا ممعناش
يا بنى الحقيقه إننا
ناس عندنا أخلاق ودين
والنوع دا صعب فى وقتنا
تشوفه عايش وسطنا
وقليل مابين الموجودين
لكنه سهل تعرفه بين النفوس
لانه صعب تلاقى منه معاه فلوس
أحلامنا يابنى كانت اكبر مننا
مش عيبه فينا وضعف ولا عيب اهلنا
لكن نصيب وكان قدر مكتوب لنا
أما دعائنا لربنا
فى حاجات كتيره لو معانا تضرنا
علشان كده بتلاقى حكمة ربنا
يرزقنا بسإللى يادوب على قدنا
وكفاية نومنا مرتاحين اخر النهار
وكفاية نضمن إننا مش أهل نار
مش انت مره قولتلى
بفرح يابابا لما بشوفك وسطنا
صدقنى يابنى الحقيقه إننا
من ربنا واصلنا كامل حقنا.
