كتب حنان محمد
خاينه
قطعتي حبل الوداد والدم سأل انهار…
بصمه خيانتك كفوف تصرخ بباب الدار
ونقشتي قصه وعبره على جبين زمني…
والريشه كانت بتجرح والميه كانت احبار
عندي سؤال شايفه مع كل نظره عين …
ازاي في لبس الملايكه حابسه جبال النار
يا اللي حلمتك نور وكنت بيه مبهور…
ما كنتش اعرف انه بيرك مالوهش قرار
ياللي افتكرت الصفا معجون بحرفك …
ما اعرفش ايه غيتك في اللعب على الاوتار
كنت بدوب في الصوت واحسه مزيكا…
دي الصين دي فبريكا فيها عيال شطار
معقول صناعه الزيف ولا الخيانه كيف…
ومطرب العشاق مابقاش خلاص زمار
درويش جاور الرحاب من فعل ايامه…
وجنب قبر الوفا اخد خمس تشبار
والنغمه عزفت حزن على العهد والكلمه…
وسلم لأمر الله ماهي كلها اقدار
ولما الألم سجنه اتعشي من وجعه…
والعين صحيح غفلت والروح مع السمار
شاف في المنام ايه راجل على عصايه…
قال الحكيم افرح دا انتا ياواد مختار
والله صدقك حماك نجدك من الأوهام…
نور بصيرتك بفضله وكشفلك الاسرار
سامح يسامحك بفضله والحق في ميزانه…
حقك هيرجع هيرجع من الخاين الغدار
اغسل همومك بذكرك وكون في رحابه…
واللي لزم بابه بيكون من الأخيار
