كتب حنان محمد
الوردة.. والعفريت
للورد فى زمن الوجع تقاسيم
تشهد عليها.. جنة المظاليم
مش جنتك ياعاشق الدنانير
ولا جنة السارق لروح الغير
……………………………
الشمس طلت…
والسحاب لملم.. حزن الحكاوى
وفتَّح البيبان…
للهم يهجم يمتى تانى
وشوارع الجنة براح مسكون
بخطوتى التايهة.. منين.. ولفين؟؟
قالت خيوط الشمس : ياولداه…
دوَّر على العفريت.. وفين تلقاه
راح تلقى وردة قلبك المدبوح
صرخت عيونى :
طب وفين راح اروح؟؟!!
جاوبتنى بعض عيون بتشهق نار
الشمس بانت.. بعد ما العفريت
نادى على الوردة.. وخدها وطار
حُط الخطاوى وشيلها يا مسكين
حُط الخطاوى فى السحاب.. يمكن…
تلحق تشم لوردتك ريحة…!!
حُط الخطاوى فى التراب البور
يمكن تعود الجنة.. للأفراح…!!!
*****
الشمس عِلْيت.. والسحاب مجنون
وعيون كما الغربان محوطانى
وضفيرة الحلوة فى قلب الريح
تجرى وراها دمعتى مشاوير.
واحلم…
أحلم أعود إنسان من الأول
مفطوم على نظرة دفا وحنان
قادر أكون.. وتكون لياليّه…!!
لكن..
عيون الديب لوردتى.. توهة…!!
خاطفة خضار عنقودها.. ع السكة
وضفيرة الخايبة شعور طايرة
غطت جبين الشمس.. غيم وسواد
والوردة ( نون ) متشعبطة ياولاد
بين السحاب والريح.. وشوق القلب
ترمى عليها الشمس لسعتها
تحتار فى أمر ( الميم ) وشهوتها
تسأل عيون قلبى.. أجاوبها :
كل اللى كان.. مكتوب على قلبى
كل اللى جاى.. خايف عليه منك
يا وردة باعت نصها للريح
والباقى منها.. غنوتين مجاريح
ساكنين وريد الروح يانوارة
وآدى سواقى الجنة محتارة
تسأل سحاب الكون بلهفة وشوووق
معقولة مية نيلى.. ماترويش…!!
معقولة شمس اليوم.. ما بتدفيش…!!
إلا اما ياخدوا أمرهم م الغول…!!
حُط الخطاوى.. وشيلها تانى وقول :
الوردة وردة.. لو فى كف حديد….!!!
حُط الخطاوى وشيلها يا( ابو حميد )
مطرح ماتلقى إن فيه أجاويد…
حافظين مقام الشوق وتباريحه
واخدين عهود الورد.. نار ونغم
النار…
دى مذهبهم فى وقت الهم
وبراءة الأنغام…
تعود تانى…
لما تعود الجنة للأفراح .
