بعد ماشاب ودُّو الْكُتَّاب
رُو
[ بعد ما شاب ]
بعد ماشاب ودُّو الْكُتَّاب
رُوح ياحبيبي هناك واتعلِّمْ
علشان تبقي فَهِيم مِتْفَهِّمْ
تبقي فصيح وجميل تِتْكلِّم
تِأْرَه جواب جُرنال ومْجلِّهْ
ولا تِقعدْشِي ياخُويا مْبلِّـم
ولَمَّا تْجِيك من شخص رسالة
فما فيش حَدّ بسِرِّك يِعْلَم
علي طول سرك طَيِّ الغِيب
ولامخلوق لدماغك يخْرُمْ
تبقي مثقف علي طول فاهم
ولاتبقاش كده سُكْتُمْ بُكْتُم
طَلَّع قَلمَك وامضي ياباشا
إوعي تقول أنا صَبعي هيُبْصُم
أو أنا هَقْطع خِتم حديد
علشان أي وثيقة انا هَخْتِم
يلله التاني هييجي وراه
إذا كان فاتك قطر تَعلُّم
قطر العلم سريع وبيجري
واللي يفوتك غيره يلَمْلِم
عُمر العلم مالوش مواعيد
من ساعة المهد لحَدّ المأتم
اطلب عِلمك لو في الصين
أو حتي يكون ف دويلة نَمنَم
ياما فيه ناس ماكانتشي بتعرف
تِفْرِق فول عن زِبْل غَنَمْنَم
بَقَلْها اليوم ف الناس حَيْثِيّة
كله بيسمع إذا يتكلم
حتي موبايل يعرف يطلب
وعلي الجوجل راح يستعلم
وعلي المَسَسِنْجر عمَّال يِكتب
ودا ع الواتس سلام ويسلِّم
ولمَّا تروح تصرف م الماكنة
بكل سهولة فلوس تتسلِّم
ولاتِدِّيش لغريب الفرصة
يخش معاك بعدين تتألم
سرقوا فلوسي ونهبوا معاشي
يامَا قلنا لك رُوح اتعلّم
سَحبوا رصيدي بقيت ع الزيرو
يانِي ياخِبتي ياريتني اتعلِّم
تابعونا على صفحتنا الفيس بوك
