دكتور هدير حسانين
علم طفلك مهم جدا انك تعرف إن من ضمن الشخصيات التي تقوم بفعل الانتهاك هم ( العم، الخال، الجد، الأب ، صديق الأسرة ، الجار، المدرس الخاص، محفظ القرآن …) كل دول مش خونة … لكن خلي بالك.
الدراسات بتقول ان أكتر من ٨٠% من حالات الاعتداء على الأطفال بتكون من أشخاص قريبين من الطفل (أقارب ومعارف) مش أغراب.
١- نبِّه على طفلك الصغيرة ما تقعدش على حجر مخلوق غير بابا وماما
٢- ما تخلعش هدومك قدام طفلك علمه إنك تستأذنه يخرج وهو كمان لو بيغير يستاذنك تخرج.
٣- لما طفلك يلعب مع أطفال تانيين خلى فيه طريقة متاحة دائما للإطمئنان على طريقة لعبهم لازم تفضل متابعهم
٤- ما تضغطش على طفلك في زيارة حد هو مش بيستريح له.. وحاول تعرف ليه مش بيستريح له
٥- لما طفلك يبطل لعب وتنطيط فجأة ويبقى هادي ومنعزل يبقى انت محتاج تتكلم معاه كتير وبمنتهى الصبر.
٦- علم طفلك ان ف اماكن ف جسمه اسمها الاماكن الخاصه ممنوع اي حد يشوفها او يلمسها ودي الاماكن الي بيغطيها المايو
٧- اتفرج على أي فيلم كارتون انت جايبة لابنك قبل ما يشوفه، واتفرج معاه مرة كل فترة على طبيعة الحلقات اللي بيشوفها في التلفزيون.
٨- علم ولادك مبكراً قدر الإمكان ازاي يدخلوا الحمام ويغسلوا لنفسهم من غير مساعدة
.
٩- لما طفلك يشتكي من شخص خد شكواه بمحمل الجد مهما كانت الشكوى مش مقنعة بالنسبة لك
اهتم بالموضوع وحسسه إنك مصدقه، ووصل له إنك موجود دايما عشان تدافع عنه
١٠- علم ابنك الفرق بين السر والمفاجأة .. وان ما ينفعش حد يقوله سر و يطلب منه يخبيه على بابا أو ماما.
١١- علم ابنك الفرق بين اللمسة العادية بتاعة السلام واللمسة اللي مش عادية المريبة
.
١٢-لو في شخص معين بيجيب هدايا وحلويات كتير لطفلك وطفلك مقرب منه لازم تتاكد انه شخص سليم ومفيش اي امر غريب في الموضوع
الطفل يبدأ يستوعب ده من سن 3 سنين وقبل كده كمان، وتدرج معاه في الطريقة على قدر سنه.
