كتب حنان محمد
خريف العمر
ضلمت نور الصالة ليه
خليني أشوفك وانت جاي
سيب أي حاجة تفكرك
إني باحس ولسه حي
فاكر زمان أنا قلتلك
بكره الزمن ح يغيرك
رديت بدون ما تبصلي
حسيت بإني معطلك
دلوقتي باحضن وحدتي
أنا والدوا ومخدتي
واما قابلت مخدتك
ع الخد سالت دمعتي
فين اللعب ..
فين الكتب ..
كانت على أرض الأوض
كانت تونس وحدتي
وقت الفضا تبقى العوض
قلبي اشتكى ظلم الحيطان
عايش على اللي كان زمان
والحل مش طب ودا
الحل كان لمسة حنان
كل الدوا ما يهمنيش
ولا إني أخف عشان أعيش
كل المواجع لهفتي
إنك تجيني ولا تجينيش
بعد اللي قاسيته زمان
عايش على عطف الجيران
بس الأمل بيضمني
إنك تخبط ع البيبان
مهما قابلت ف دنيتك
أنا ابوك وأعرف شكوتك
واعرف أنا نظرة عنيك
لما تداري كسفتك
بس انت حاول وقتها
تلحق تشوف في عنيا ضي
ضلمت نور الصالة ليه
كان نفسي اشوفك وانت جاي
كان نفسي اشوفك وانت جاي
كان نفسي اشوفك وانت جاي
