السيره النبوية للاطفال

كتب رويدا محمد

من سيرة الرسول للأطفال

كان يا ما كان و ما يحلى الكلام إلا بذكر النبي عليه الصلاة والسلام
ولادي حبايبي دايما لما بيسمعوا اسم سيدنا محمد يردوا
علطووووووول…..عليه الصلاة و السلااااااااااام

ممتازييييييييييييين

ربنا هو اللي خلق عينيهم

و ربنا
يقدر يخليهم ما يشفوش أي حاجة .
واقفين زي التماثيل و مش حاسين بحاجة .

وسيدنا محمد أخد تراب من الأرض …. وحطه على راسهم ….
وهو بيقول من القرآن الكريم : بسم لله …فأغشيناهم فهم لا يبصرون ….
يعني ربنا حط غطى على عينيهم خلاهم مش شايفين حاجة ….

مشى سيدنا محمد و سابهم واقفين زي التماثيل

بعد لما سيدنا محمد حط التراب فوق رأس الكفار ومشي وسابهم واقفين زي التماثيل

وبعدين صحيوا لقوا شعرهم عليه تراب

..ولقوا لسه فيه حد نايم في السرير …
افتكره سيدنا محمد نايم ….
بس اكتشفوا المفاجأة اللي جننتهم !

ده سيدنا علي هو اللي نايم .

و ربنا خرج سيدنا محمد من غيرما يشوفوه ولا يحسوا بيه .

سيدنا محمد عليه أفضل الصلاة و السلام لما ساب بيته …… راح لمين ؟؟؟

راح لصاحبه … سيدنا أبو بكر

…احنا كلنا بنجب سيدنا أبو بكر …. لأن سيدنا محمد كان بيحبه وكان صاحبه

سيدنا أبو بكر كان بيجهز نفسه عشان يهاجر

وكان بيتمنى إنه يهاجر مع سيدنا محمد

وكان مجهز جملين أقويا عشان يسافروا بيهم .

سيدنا محمد قاله ربنا بعتلي سيدنا جبريل وأمرني أهاجر المدينة
سيدنا أبو بكر بقه فرحاااااااااااااان أوي

لأنه هيهاجر مع سيدنا محمد اللي بيحبه أكتر إنسان في الدنيا

سيدنا محمد …. و سيدنا أبو بكر اتفقوا مع راجل من مكة

إن يعرفهم طريق السفر ..
وسابوا معاه الجملين .

سيدنا محمد عليه الصلاة و السلام وسيدنا أبو بكر قبل ما يهاجروا …… راحوا عند جبل بعيييد ..

جبل اسمه جبل ثور …

ودخلوا جوة الغار … فتحة جوة الجبل
فضلوا في الغار 3 أيام …. عشان كانوا عارفين إن الكفار هيدوروا عليهم في كل حتة

طب بياكلوا إزاي ؟؟؟؟
أسماء.. أسماء بنت سيدنا أبو بكر ..
كانت ست شجاعة و قوية

و مش بتخاف من الكفار …
…….. كانت بتجيب ليهم الأكل كل يوم

الكفار الأشرار …. بقوا هيتجننوا .

….إزاي سيدنا محمد هرب منهم ؟إزاي ما حسوش بيه ولا شافوه ؟؟ ؟؟.

فضلوا يدوروا عليه في كل مكان
لغاية لما واحد قالهم إنهم ممكن يكونوا عند جبل ثور !
راحوا بسرعة عند جبل ثور

سيدنا محمد و سيدنا أبو بكر جوة الغار …. و شايفين رجلين الكفار …
سيدنا أبو بكر خاف لحسن يعرفوا مكان سيدنا محمد ..

بس سيدنا محمد مكنش خايف ….

لأنه عارف إن ربنا هينصره على الأشرار الكفار

سيدنا محمد بص لسيدنا أبو بكر و قاله :
ما ظنك باثنين الله ثالثهما ..

يعني أوعى تخاف …إحنا ربنا معانا ..إحنا الصح و إحنا الحق …و ربنا هينصرنا .

الكفار واقفين جنب الغار …و لو بصوا هيشوفوا سيدنا محمد …
بس مين اللي خلق عقلهم و عينيهم
ربنا
ممتازيين

وربنا اللي خلاهم ما يقدروش يفكروا ولا يشوفوا اللي حواليهم.

و مشيوا و هما زعلانين لأنهم بقالهم 3 أيام بيدوروا على سيدنا محمد ..

ومش قادرين يلاقوه …..
ولا هيلاقوه .عشان ربنا بينصر النبي و بينصر الحق

و بيهزم الشر مهما كان قوي
و خرج سيدنا محمد ….و سيدنا أبو بكر من الغار ….

عشان يبدؤوا الرحلة … للمدينة .
يا تري هيحصل معاهم إيه في الرحلة دي ؟؟؟؟؟

هنكمل بكرة إن شاء الله

للهم صل علي سيدنا محمد