كتب حنان محمد
خيبة الأمل راكبة طيارة
صباح الخير يا أستاذ ، سألت عليك في كل مكان ، مفيش مكان شكيت أن حضرتك ممكن تروحه الا ورحته، يمكن اعتر فيك .
,_ خير ؟! هو انت عمرك يجي من وراك خير يا وحل البرك ، مالك يا قنصل الوز ؟
_ أنا بيحصل لي حاجات غريبة قوي اليومين دول يا استاذ
_ انت كلك على بعضك بني أدم غريب ومريب ، زي المخفي بتاع التعليم عن بعد ، إيه إللي بيحصلك يا زحل ؟
_ أنا شاكك يا استاذ أن الولية دي عامله لي عمل .
_ أنا اشك اذا انا دبوس ههههه ، عملك أسود انت وهيا ، حيرتني يا مخفي ، يعني ام حسن حسدتك والا الفرسة رفستك وعملت لك عمل ؟!
_ والله منا عارف يا استاذ ، اهي المصايب بتتحدف عليا ورا بعضها .
_ طب اتاخر وهات م الآخر عشان مش فاضيلك.
_ بقالي اسبوعين كل يوم بالليل ألاقي رجلي وخداني ومودياني لحد البيت واقف تحت الشباك لحد النهار ميطلع أرجع تاني للتروسيكل .
_ أهلا يا سي روميو ههههههههههه هيا النداهة ندهتك والا إيه ، ناقص تغني : أمر علي الديار ، ديار ليلي ، أقبل ذا الجدار وذا الجدار وتصبح على ابن الملوح ببوستين في الهوا ولوحظك حلو حتبوس الواوا اح ههههههههه
_ بالله عليك يا أستاذ متسخر مني
_ واكيد كمان بتمشي وانت نايم ، ودايما علي لسانك كمان : تحت الشتا ،في أول شتا، حبوا بعضن
، وتحت الشتا في تاني شتا تركوا بعضن ،
بص يا نحنوح أنا ارشح لك حاجة اجمل تكتبها علي ورقة لحمة وتعلقها علي صدرك وان شاء الله حتبقي فل الفل .
_ الحقني بيها أنا في عرضك ، وبلاش تعليقها علي صدري دي ، حفظهالي أحسن
_طب يلا اطلب لي قزازة بيرة .
_ هو ينفع تعملي حاجة وانت بتشرب بيرة ؟
_ العمل السفلي اللي عملهولك ده مينفكش غير بالبيرة ويا حبذا لو سيجارة حشيش معاها كان الشغل يتظبط
_ ادي البيرة وادي السيجاره المعتبرة
_ حلاوتك يا فايزة لما تبقي عايزة .
_ فايزة مين يا استاذ دا اسمها حنان
_ مش مهم الأسامي يا جحش ، يلا قول ورايا : كارهك يا زماني يا مكاني ، عاوز ع الشيشة الصنف ده ثاني . يلا قول متنحليش كده ههههههههههه
_ حاضر يا استاذ ، والله منا فاهم حاجة
_ وانت من امتي بتفهم يا جحش ، يلا قول ورايا : قال جاي وجايب كام وردة ، فاكر دا يرجع ليالينا ، لو كان الورد يجيب فايدة ، كانوا كل اتنين زرعوا جنينة وتقراالفاتحة لعمك سميرالاسكندراني في سرك .
_ الله عليك يا استاذ ، صحيح يا ولاد العلم نور . أنا بدأت أحس براحة غريبة .
_ طبعا يا حمار انا اللي أشرب وانت اللي تنسطل ههههههه
