كتب حنان محمد
حل المسألة
هيه ٠٠هيه المسألة
وهو نفس الجبر
نجمع ٠٠نجمع
والجمع لازمه صبر
لا فيه كراس مسطر
ولا كتاب مقرر
ولا دواية
حبر
*********
نطرح ٠٠نطرح
والطرح لازمه شبك
والشبك عايز البحر
والبحر أخطبوط
وف قلبه جرح غويط
ينزف من زمان الموج
والموج مليان ضراوه
يخنق ورود الأمل
بكل عنف وقساوه
وللموج بنعافر
بالدم والضافر
بنعافر كيف المهر
واللي راح يحني
ما يجني غير
القهر
*********
نقسم ٠٠نقسم
والقسمه عايزه العدل
نقسم ٠٠نقسم
وعند الحصر
يطلع ناتج صحيح
وناتج كسر
**********
نضرب ٠٠نضرب
والضرب ف الغلابه
وسط الناس الديابه
وطوبه زي بابه
والظلم علينا كاسر
نسأل ولا فيش إجابة
أيوه يابا ٠٠أيوه يابا
اللي هايرفع ف صوته
تنهش لحمه الديابه
واللي يرضي الهزيمه
مش راح يشوف النصر
واللي يهوي البراري
ميلزموش القصر
**********
نجمع ٠٠نطرح
نقسم ٠٠نضرب
هيه ٠٠ هيه المسألة
وهو نفس الجبر
وعند حل المسألة
تبقي النتيجه
صبر
تبقي النتيجه
صبر
**********
الشاعر محمد علي فرغلى احمد
معلم خبير بمدرسة أبوتيج الصناعيه العسكريه بنين
