نشر حنان محمد
إشتم … إجرح …
خلى كلامك سكين حامى … إدبح …
إفتح عينى .. هتشوف صورتك .. كانت شبهك … إمسح ..
إكتم نَفَس الفرحة ف قلبى …
إقطع وردة … رويتها بحبى …
دبلت قبل ما تتفتح …
إشتم … إجرح …
إشخط … زعق .. إخنق كل مشاعر حلوة
قبل ماتكبر جوه كيانى .. وف وجدانى تسرح …
إشتم … إجرح …
ليه خليت الفرحة تمشى … بعد ماكنت بحب وبفرح ..
ليه ضلمت الصبح ف وشى .. بعد ما شقشق ..
بعد ماكان عصفور بيزقزق .. نوح ..
ليه بتطوح كل آمالى .. ليه قلبى ف قلبك مش غالى ..
حتى سؤالى .. مايهمكش .. ماعرفتكش ..
ماعرفتكشى لما سبغت عنيك بالقسوة ..
لما النسمة قلبت نوة .. فجأة غرقت .. بعد ماكنت ..
ف بحرك بسبح …
إشتم .. إجرح ..
كنت بشوف طيفك ف منامى .. كنت بشوفك …
كنت بشوفك قبل ماشوفك …
كنت أتمنى إنى أشوفك .. صدر حنين ..
عمره مايقسى ع اللى يحبه ..
لو هيعاتبه .. لسانه حنين
عمره ما يجرح ..
لو تسمح .. حاول تسمعنى ..
ماجرحتكشى .. ليه تجرحنى ..
وبقدملك كل ما عندى ..
لاجل ماشوف قلبك متهنى ..
وإنت تهيننى .. ؟!
نفسى أقوللك نفسى ف إيه …
نفسى أروح للى خلقنى ..
هوه أحن عليا .. منى ..
هوه وحده اللى بيسمعنى .. وبيفهمنى .. من غير ماأشرح ..
إشتم .. إجرح ..
