قلب البحر
فى قلب البحر المحذوف شَطُه
عمال بيشد فى خيط سِنارته
نفسه فى حلم يرد له روحه
عروسة بحر تجيبله طموحه
كنز يطيب مره جروحه
لكن خيبته غالبه شطارته
وتروح موجه وراها الموجه
وهو بيلعن أُم الحوجه
والسكه ال علطول معووجه
طالعه ياعيني فى أول بخته
ويبص بعيد على مدد الشوف
يلمح بدر مايعرف خوف
كل النجوم حواليه بتطوف
وفجر بيجري يلحق وقته
ونهار يمحي ظلام الويل
وضحكه تِجُر حكاوي الليل
ومركب راسيه شَده الحيل
بتلملم فرحه فى قلب شبكته
فى قلب البحر المحذوف شَطُه.
تابعونا علي صفحة الفيس بوك
