كتب حنان محمد
ما تكدِّبوش
ما تكدِّبوش الشمس في عز النهار
وماتنكروش ع الفجر دوره ف الوصول
ماتسجلوش الفرحه قبل الإنتصار
وماتضحوش ضحكة الفايز بكعة عيد / ومن إيد اليتيم
وخلٌّوا بالكم م التاريخ
جوَّاه خانات للمستبد مكيَّفه
لو كانت الأحلام بتتحقق كدا بالفهلوه
كات الكلاب ممكن تدافع عن بيوت أسيادها يوم بالنونوه
وحذارِ من أكل الوعود .
فياريت تحاولوا تقروا اللي مكتوب /
علي خدود الغلابه بالدموع
وجهزوا كل الشموع ف جيوبكوا جايز
ف ليله حتروح خطاويكم للضياع
تستعملوها ف سكة الوجع الأكيد
حزِّموا كل المتاع
واستنوا دوركم ف الرحيل
البلد دي مش مشاع
والولد دا مش يتيم
البلد دي بتتولد في كل جيل
والولد
له جدر شرعي ف أرضها
في كل شبر وكل باع .
