بقيلكم كام..عشرة.. عشرين.. تلاتين.. أربعين
أيام وسنين.. بتعدى علينا
تعد علينا.. باقيلكم …كام ؟
ماحناش حاسبين..
كنا حاسبين إن الأيام.. هتلف تدوور..
مش هتشوفنا…
أتارينا بنعد الغمييضة..
واحنا اللى بنجرى ورا الأيام.. .
وبنسأل بعض… باقيلكم… كااام ؟
عشرة.. عشرين.. تلاتين.. أربعين..
أحلام أوهام… وسكات وكلام…
وتراب مسحوور.. غرقان في بحوور..
وسؤال محشور.. هوه إنتى يا ماما عندك كام ؟
كان عندى عشر وردات بلدى.. ف خدى.. ودبلت..
وعشر نجمات لونهم فضى.. بس إسودت..
وعشر حبات لولى ف عقدى..
غصب عنى.. منى إتفرطت..
وسرحت …أعد.. لقيتنى كبرت..
وسمعت الصوت بيقول.. يللا.. لموا الأجرة…أربع عشرات..
أنا أصلى بقيت.. بركب وامشى..
وماباسألشى التوصيلة بكام ؟
وباقيلكم … كااااام ؟
عشرة.. عشرين.. تلاتين .. أربعين..
وقفي يا سنيني … وماتعديش ….
وقفي عجلك.. شدي فرامل.. هدي لحد حدود الفرحة.. وماتعديش…
واللقطة الحلوة.. عيديها كتييييير…
بنت بقصة.. ف حضن أبوها .. قلبها بيدق .. نفسها تلبس فستان كرانيييش…
كان نفسى أشيل كل التفاصيل.. جوة ف قلبى.. علشان ماكبرش …
كان نفسى أحوش كام ضحكة على كام غنوة.. علشان مابكيييش…
كان نفسى أعييييش… من غير مااحسب .. مين خد منى..
وفاضللي… مفييييش….
ومفيش عندي… غير الأرقام … عشرة.. عشرين.. تلاتين.. أربعين..
أياااام وسنيييين… بتعدى علينا… تعد علينا….
….. باقيلكم كااااام…. ؟؟
عدينا.. لقينا… خلاص ماباقيييييش.
تابعونا على صفحتنا على الفيس بوك
