كتب حنان محمد
البحر
البحر اصلا كان مجرد أرض فاضية الخوف ماليها
والناس في عز الحزن كانوا بيبكوا فيها
وواحدة واحدة الدمع زاد
والناس عيونها اتعودت
متسيبش صناديق دمعها في كل البلاد
الأرض دي كانت بتقدر تسحب الخوف والقلق
وفي عز أمواج الهموم مكانتش تسمح بالغرق
الدمع جَمَّع نفسه على هيئة عريس
وإستنى أول دمعة نزلت من ايزيس
علشان يفض بكارة الارض الحزينة
ويعدي على موجة شرفها ب 100 سفينة
وإتشقت الأرض احتفالا بالعروسة
ومكنش فرعون السبب ولا زهد موسى
لكن دموع المجروحين هي اللي دفعت مهرها
هي اللي كتبت عقد تعمير بحرها
ومضت عليها بأهدى خط
علشان كده بنرتاح قوي
على اي شط.
