كتب حنان محمد
رمضان
رمضان اهو جانا هنتسحر
رمضان البركة اللي بتحضر
من العام للعام
والمدفع بعد مابيصدق يعلن إفطار
من صوت واذان الشيخ رفعت
شرب العطشان
والشارع بعد ما كان صحرا
اتحول بيت لاجل المارة
بموائد خير من الرحمن
رمضان السحر اللي بيفرض
نفسه علي القادر والغلبان
رمضان الوقت اللي بيفصل
من توهة قلبك في الايام
إيه يساوي القاعدة اما بتكمل
طبلية الاهل فـ شهر صيام
صوت التراويح جوا الجامع بخشوع لعروس القرءان
بتحرك قلبك لو ساكن
وتمده بطعم الإيمان
بكار كان نفسه يعيش لكن
فارق مع ناس غالية وراحت
هتعيش بالذكرى فـ كل مكان
وفانوس الشمعة اللي اتاكل
من وسط جديد كل الفوانيس
له بصمة عظيمة علي صوابعك
هتعيش وهتحلف عمرك بيه
وعيال الشارع بتحول
اركانُه نجوم بيضا فـ لياليه
الكل بيسعى انه يوصل
مافُرض عليه من شهر فضيل
رمضان والله مابيقصر
بالخير بيجمع شملنا فيه
وفراقه الطيب بيكافئك
تفرح بالعيد
رمضان الوقت اللي بيسمح
للقلب يعود تاني جديد
فيه ناس بتصوم السنة كاملة
وتستنى فرجها اما يجيلها
من شهر كريم
طهر أيامك بالصدقه
هيه البقيالك مش ملاليم
والله الفرحة فـ عين فقرا
تشبه للجنة بكل نعيم
رمضان من عطفه بيسمحلك
تتقرب من رب رحيم.
