كتب حنان محمد
بياع البرتقان عم ربيع
ياعم ربيع
يا أول حبة رمل انتفضت ضد التطبيع
يا أول شاري ف كرامة الكل
لما الكل يبيع
أخبارك إيه
احكيلي
انتا بتاكل إيه وبتشرب إيه
والدم اللي بيجري ف جسمك دا
معمول من إيه ؟؟؟
أنا عارف والله
بس أنا قاصد ناس تانيين
انت الوحداني الصاحي الفايق
ف أمم نايمين
أنتا اعقل واحد وسط المجانين
اتبرعت بحاجة يعني ( مش ع القد )
بس زنقت أصحاب الكرافتات والعربيات السودا
والنمر السودا
وارصدة البنك
وحفلات الأعياد الشيك
خليت كل وشوشهم للحيطة السد
قول لي ياعم ربيع
هوا انتا حسبت الحسبه ازاي
وازاى فصَّلت لنفسك عزة نفس
من أخلص نيه وأنضف توب
زينا كلنا
الحال مكشوف والريش منتوف
عايشين ف بلدنا ضيوف
ياعم ربيع
انت مضيت عننا ف سجل حضورنا
ودفعت ضريبة حبستنا ف دورنا
ووقفت بدالنا ف أجمل طوابيرنا
روِّيت من عرقك
الحته الخايخه ف جدورنا
