كتب حنان محمد
عزيزه ويونس
بتقولي بتحبني والفعل عكس القول
الدمع سابق كلامها وليه اكون مسئول
دا الحب بحر ياناس غريبه اطواره
واللي لزم داره ينجي من المجهول
يا اللي مخبي الحقايق هتنكشف دوغري
دا الصدق بين العباد خلي العوج معدول
قصتنا بين اتنين لعب الزمان بينهم
ولو عليه صليتوا هسرد انا وهقول
ولد في عمر الشباب ف مشيته حكمه
عايق في كل مافيه وعوده كان مفتول
الكلمه منه دوا تشفي العليل بلسم
ورئيه وسط الرجال حاسم وقد القول
متربي وسط الكرام في جزيره العربان
يا ابو زيد فتنت الولد واللي صبر هينول
والحلوه في قصرها بجمالها تتغندر
بنت الزناتى الهمام وبالها كان مشغول
شافت مابن المنام فارس على حصانه
بسهمه رمي قلبها والقلب كان مقفول
جاب القدر يونس لتونس الخضرا
والحلم أصبح حقيقه والمستحيل معقول
والعشق جمع قلوبهم من نظره ياساده
بقت دقات قلوبهم مسموعه زي طبول
وفي عاركه بين العبيد ابو زيد قتل ميه
وخدوه جنود الزناتى والكل قال مقتول
قالت عزيزه ليونس هنجد انا خالك
جريت على العلام اصيله بنت اصول
أهل الرباب احباب علشاني انجدهم
اركب وهات الكرام من بين أيادي الغول
وعلشان خلاصهم معجزه والحب عرابها
بقت في صدر الزمان قصه وليها فصول
يا اللي سمعتم روايتي ردوا على سؤالي
في الحب ينفع كدب وبكدبه ايه هينول؟
