شدوا العقال
نادي المنادي ف كفرِنا
ونشد وقال
شدوا العقال
ياعقل مش حتشوف جمال
طول م انت عايش ف الضلال
يا اهل المروءه اللي ب إديكم
حنشد ف شراع المراكب
بالحبال
وانتوا يا أهل النفاق
أهل القفا ويا القتب
الصدق عمره م اتغلب
ياسمكريه ف الكلام
مالكوش لقب
مالكوش جدور
زي لبلاب الغيطان
بيعيش كدا من تعب
علي مص دم الأرض والعرق الحلال
ما بتكبروش من نفسكم
مابتستحوش علي دمكم
تستنوا ف الشجر الأصيل
واتروَّي من عرق الجبين
تتسحبوا وتمشوا عليه
وتقضُّوا باقي عمركم
عايشين ف ضله
حارمينه من نسمة هوا ف فصل الربيع
مرِّت علي غيطه البديع
ف اتشكلت منها الحياه
لازم حييجي يوم أكيد
فيه حتحنوا له الجباه
لازم حتحنوا له الجباه
تابعونا على صفحة الفيس بوك.
