كتب حنان محمد
خبيت احلامي ف ازايز
علشان مش عايز
وقلت خلاص
وقفلت الباب اللي تجاهك
اتاريني اتحاولت لحالة
واتسرسبتي كذا حتة ف بالي
وحاولت انام ومش عارف
اتخلص من برد يناير
ولا اخرج حبك من سدري
وكانك مرسومة على قدي
ازاي اتغير مش عارف
وانا كلي احساس اني شايف
ف مريتي صورتك حاضناني
2
تسمحيلي نكسر الخوف فتافيت
ونقسم ما بينا الحلم
تسمحيلي اتقدم خطوة تاني
تسمحيلي بالرقصة ده
3
قول امين
وامسح بكفك وش الليل
طعم الحليب من سدر بنوتة حلوة
مبقاش بيروي غربتي
هفضل جعيان
وايدي ع الاسفلت
بشد العضم جوه جراب محتني
ولا انتشيت لما حضنت الخيال ف مرايتي
ولا المرايا لمت تفاصيل الحياة الصعبة
ولا الجرح شفا
لسه النزيف ع كف البوح
والموت م الاسئلة سكة الراحلين
والمخاليق صفوف
والسكوت بيقتل كما بيتقتل
4
ولاول مرة المح ف عنيكي
شوق مش ليه
مع ان البعد مكانش بايدي
لكن مكتوب ونصيب
ولاول مرة احس رغم القرب
انك مش جمبي
وان اللي بينا بيتسع ع طول المدي
