كتب حنان محمد
الكلمه:
الكلمة فيها حروف كتير
عماله بتشق الورق
في حرف كان بيقول بحب
إزاي يضيع أو يتسرق؟
وحرف كان بيشع ضي
و يملى كل الكون عمار
ليه سبت حرفي
الحلو تبهت طلته
و شعللت قلبي الحر نار
دراعاتي تشهد ع الخضار
و ضواحي قلبك
تحكي لو يوم تتسأل
مين اللي عمر أرض بور
و سقاها نور طرحت أمل؟
عرق الجبين كان طبطبه
و لا عمري مره شكيت وجع
عمري اللي مبدور ف الهوى
نبت عيدان مشتاقه ليك
علم غيطان العشق معنى العشق
من طينه اللي ساقي
وشمس بتضلل عليك
ازاي تخون البذرة ارض
مدفياها مكفياها
مشبكه فيها الحياه تشبيك
إزاي يهون العمر وتهون العهود
وتنكر العرق اللي مدفوع فيك؟
