كتب حنان محمد
(بهية)
ياريتك تصبري عليا
ياريت حضنك يكون ليا
ياريتك تعطفي عليا
و تنهي غربتي فيا
أنا باهواكي و باريدك
أنا باهواكي يا بهية
أنا باهواكي و حنيني
بيجري في شراييني
بحق ولادي و سنيني
بلاش تقسي كده عليا
______
بلاش العيشة تبقى مرار
بلاش تسقيني مر الكاس
تعبت باقاوم التيار
و احايل ناس و اقابل ناس
بلاش ترميني جوه النار
بلاش الفاس تقع في الراس
_____
بلاش تسيبيني للحرمان
بلاش تنسيني في الأحزان
بلاش تتعاجبي بشراعك
على المية و انا العطشان
دا طعم المر يا بهية
ملا جوفي وانا الغلبان
و طول الهجر يا بهية
بيخلق غربة الأوطان
أنا عاشق تراب أرضك
و من غيرك أنا الخسران
و عمري ما عزت غير حضنك
أنا نفسي أكون إنسان
أنا نفسي أكون ضلك
أنا اللي بلقمتي شقيان
_____
أنا اللي اشتقت للأفراح
أنا اللي في البلاد سواح
أنا العامل أنا الفلاح
أنا الإيد اللي ما بترتاح
أنا الجندي اللي صان عرضك
أنا الإيد اللي شايلة سلاح
_____
أنا لو جارت الدنيا
ما فيش غيري يصون خيرك
أنا ع الحلوة و المرة
ما فيش غيري ولا غيرك
أنا اللي باقي ع العشرة
ما فيش غيري اللي باقيلك
______
أنا يا غالية أفديكي
أنا عمري ما اكون حائل
ما بين حلمي و بين حلمك
مسير أحلامنا تتقابل
و صوتي اللي اتنبح فيا
ما حدش مرة كان سائل
أنا اللي الهم خلاني
لا انا مجنون ولا عاقل
و اشوف الدمع في عنيكي
و دمعي ع الخدود سايل
و أنسى شكوتي فيكي
و أشواقي اللي تتمايل
بلاش القسوة يا غالية
أنا المرة دي متفائل
_____
و صوتي لو في يوم يوصل
برغم الصعب ح ادعيلك
و عود الورد لو يدبل
تلاقي مين يغنيلك
أنا اللي ضلوعي من طينك
أنا عمري اللي ف سنينك
أنا اللي ع المدد شافك
و شاف غيري يدوق خيرك
و بعت الغالي
ياغالية
و مش فاضل أبيع غيرك
و لو حكمت ح ابيع عمري
لكني عمري ما ح ابيعك
