كتب حنان محمد
بعترفلك ..
إني خايف ..
وإن كل الشِعر عندي
كان كلام فوق الشفايف
واني مش فاكر طريقي
وإني ساذج ..
واني باهت ..
والسنين في ايديا تاهت
واني مش قادر حقيقي ..
بعترفلك ..
ياللي دارى الضل رسمِك
إني أضعف صورة مني
وإني خايف م الليالي
تسرق الأيام في سني !
وإنتي أكتر حد عارف
بعترفلك
إني خايف
وإني رغم اليأس شايف
حضنك أقرب م النهار
فا اذكريني يا حبيبتي
لما ينزل ضى يطرح
م القلوب .. قلبين طُهار !
وإن مجاش الصبح غني
وإن مجاش الحق غني
وإن فارقتِك غصب عني
حصليني ومتغيبيش
وإذكريني بحلو فيا
اذكريني بخوفي مثلا
لما قولت مَهمِنيش
بعترفلك
إني خايف
ألقَى كل اللي إتوهبته
في الحياة شوية أغاني
لما أموت
مَيكفوكيش !
