كتب رويدا محمد
الحلقة السادسة والعشرون
من سيرة الرسول للأطفال
كان يا ما كان و ما يحلى الكلام إلا بذكر النبي عليه الصلاة والسلام
ولادي حبايبي دايما لما بيسمعوا اسم سيدنا محمد يردوا
علطووووووول…..عليه الصلاة و السلااااااااااام
ممتازييييييييييييين
أول لما الكفار لقوا المسلمين نزلوا من علي الجبل …
رجعوا تاني بسرعة وطلعوا فوق الجبل مكان المسلمين وهجموا علي المسلمين تاني
و طبعا مفيش حد فوق الجبل بيحمي
المسلمين
اتجمع المسلمين الشجعان حولين سيدنا محمد و فضلوا يحاربوا الكفار بالسيوف
وسيدنا محمد بيحارب معاهم ..
كل المسلمين حولين سيدنا محمد خايفين لحسن الكفار يؤذوه ..
و بيحاربوا كلهم بأقصي قوتهم …
بس الكفار الأشرار المرة دي قتلوا مسلمين كتير …أوي
فسيدنا محمد أخد المسلمين اللي معاه
وجريوا بسرعة بالأحصنة و راحوا ورا الجبل …
قائد الكفار الأشرار طلع فوق جبل أحد و هو فرحان …
و قعد يقول : و قعد يقول كسبناكم كسبناكم في معركة جبل أحد زي ما
كسبتونا في معركة بدر ….
بس واحد من المسلمين الشجعان رد عليه ….
عمركوا ما هتكسبونا …
عشان احنا اللي يموت مننا في الحرب احنا المسلمين هيدخل الجنة ….
لكن اللي هيموت منكم يا كفار هيدخل النااااار ….
عمركوا ما هتكسبونا …
مشي الكفار و رجعوا مكة
و رجع المسلمين المدينة بس المرادي كانوا زعلانين
كانوا زعلانين إنهم ما سمعوش كلام سيدنا محمد …
بس اتعلموا أهم حاجة في حياتهم …
إن لو المسلمين عايزين يكسبوا ….يبقي لازم يطيعوا سيدنا محمد
و يسمعوا كلامه في كل حاجة يقولها …
🌼لو إحنا عايزين نبقي كسبانين في كل حاجة في حياتنا
يبقي لازم نسمع كلام سيدنا محمد في كل الحاجات اللي علمهالنا …
ولو احنا عايزين ندخل الجنة اللي فيها كل حاجة بنحبها
يبقي برضه لازم نسمع كلام سيدنا محمد
في كل حاجة بيعلمها لينا
وهنشوف بكرة ان شاء الله إيه اللي هيحصل بعد كده
تصبحوا على خير يا حلوين
انتظروووونا
اللهم صل علي سيدنا محمد
