كتب حنان محمد
مشكلتنا
مشكلتنا ومصيبتنا
ان مش عارفين قيمتنا
ونتلكك ونتفكك
ونتشكك فى خطوتنا
تاخدنا الخطوه للتوهه
نلاقى السكه مشبوهه
نحاول لملمة ذاتنا
ونخسر كل قوتنا
ونشبع لما ناكل بعض
ولما ف نفسنا بنعض
نشوف صورتنا فى مرايه
ومنها الكل راح ينخض
كان علينا متقدر
فى وقت الجد بنهذر
ونزرع جرحنا ف روحنا
وننتج منه ونصدر
نسلم امرنا لغيرنا
وغيرنا يعبى من خيرنا
وخيرنا علينا يتحرم
ولما نقول ونتكلم
تجف الكلمه والمعنى
ولا م الدرس نتعلم
ولا فى حد يسمعنا
تزيد فينا مواجعنا
وتتشتت مواضعنا
ونلقى نفسنا ضيعنا
وضاع الشكل والصوره
نعيش وعينينا مكسوره
ونرجع تانى للدوخه
وزمن ابو رجل مسلوخه
وغريب الدار
ماعادش هذار فى وقت الجد
ولا عاد حد طايق حد
وكل اللى اتبنا ينهد
وينداس تحت رجلينا
ننام ننعس ولا حدش يصحينا
ولا حدش يصدقنا
تموت م الضحك اخلاقنا
وع الحاضر وع الماضى
تزيد سرعة سواقينا
وتفضل دايره ع الفاضى
واسيبها لوحدها تغنى
وانا عن نفسى مش راضى.
