كتب حنان محمد
ما بين قوسين
كل اللي راح أو فِ الإيدين
ما بين قوسين
تفتح رئه
وتشد عِرق النور
وثور
ارسم صور
لَوّن في حِلم كبير
ودُور
إهرب بحبل المشنقه
إوعى يشوفوك
وارتاح على وِش القمر
لو رَيّحوك
دانتِ اللي ما عُمرك ما جِبت
في سيرة أبوك
ولو يندهوك
ارفع ايديك فوق في السما
واهرب في لحن التَمتَمه
ويّا الحنين
ما بين قوسين
إدعي بدعوة مظلومين
دا البير غويط
بالع هموم كُل البشر
لكن بيحضُن في الغُلام
الحُب فعل
ماهوش كلام
وانت الإمام
مليون سلام على وقتنا
إحنا اللي منّك
وبتجري عِشق ف دمّنا
يا كل فجر ف سِحر كونَك
بتخون نهارك
عشق دارك
لكن أنا عمري ما اخونك
عمري ما باعرف أكون
عايش ظنون
ولا حتى يعجبني جنونَك
كل اللي راح منّك قليل
لو تندهُه يرجع بدونَك
عايش حياته ف كلمتين
((ما بين قوسين))
بيقسّم الفرحه ف عينين
على بسمتين
على شِفتين
على سِكتين
كان السفر وبلاد تسافر جوّه منَّك
لكن بتبعِد خطوتين
والشمس تسرَق خوفها منَّك
لا نهار تشوفه
ولا ليل بيسهر بُعد عنّك
وانت اللي واقف
جوّه نن العين براح
واقف تسامِح
كل اللي محتاج للسماح
ومعاك دعاء الطيبين
((مابين قوسين))
ما بين قوسين
