ضربة معلم
ضربة ف مقتل وف وقتها
ومين قدها بس آهي جات ياولاد
ضربة معلم لكل معلم بيخالف ضميره ويخالف الناس
ويقول إن ده حقي ياجدع
وحقي برقبتي
وعلى جثتي !!!!
ارجعي يا ذاكرة
من فضلك شوية
لأواخر التمانينات وأوائل التسعينات
***
كنت بدرس ف مدرسة خاصة ولسه متخرجتش من الجامعة يومين أروح الكلية أحد وثلاثاء وأربع أيام أشتغل في المدرسة
وعندي طلبة 8 فصول أقل فصل مابين 35 و40 تلميذ وتلميذة
كنت هاوي مش محترف
بشرح بذمة بفهم بضمير
اشتغلت كتير
ع النحو شوية
ع الأدب شوية
ع البلاغة الرخمة
ع النصوص التنحة
(تكاد يدي تندى إذا مالمستها
وينبت في أطرافها الورق الخضر )
ياسلام ع الرومانسية
بس كنت بشرح وبعيد وأزيد كله في إطار المدرسة
لفيت بلاد وأحياء ومدن من القاهرة للجيزة لطنطا لبنها والبلد عندنا كمان
وعرفت ناس وقابلت ناس وعاملت كتير
بس الصراحة
الضربة جامدة
ف وقت خطير
الناس تعبانة
وكتير شقيانة
عايز مجموع
ترفع راس العيلة
ومالها العيلة
عايزين نشوفك دكتور
ولا ظابط ولا حتى مهندس
ليه هو أنا يعني كنت تور ؟
افتحوا الفصول من جديد
بس بشرط تبقى على نضافة
دفتر الغياب يرجع
حصة الألعاب ترجع
حصة الموسيقى ترجع
حببوا الأجيال
في الدراسة
رجعوهم يحبوا المدرسين
يناقشوهم باحترام
بلاش شغل ياعم كبر الجمجمة
ومالك يااسطى أنت سخن ؟
وجيل مدرسة المشاغبين يختفي من حياتنا
وماهو المنطق ؟
ومرسي الزناتي اتهزم يا رجالة
المنطق أن تعود الفصول للأولاد حضنا بديلا لحضن الأم
أن يعود المدرس بكلمته لا بعصاه
بشخصيته لا بالتهديد بأعمال السنة
عايزين (اليونيفورم بالعنجليزي لتقولوا علي جاهلون
بالفصحى )
يعني الزي النضيف المكوي والحذاء اللامع
والعقل السليم ف الجسم السليم
بلاش التابلت
دول هكروه وبيلعبوا عليه بابجي مع المدرسين
وازاي الحال لما الواد يقابل المدرس الصبح يقول له صباح الخير يا أستاذ إيه رأيك في الجيم بتاع امبارح ؟
بذمتك عرفت تنام ؟
ضربة ف مقتل
وف وقتها ومين قدها
وقدر عليها
حفظت جدول الضرب من ٢ ف ٢ ل ١٢ ف ١٢ أنا فاكر أنها ب ١٤٤ مش عارف لسه زي ماهي ولا اتغيرت
مع التغيير اللي حصل
مش عايز أشوف بنطلون مقطع لابسه ولد أوبنت
والمدرس اللي يلبس مقطع بالسلامة على التحقيق
تعالوا نبني جيل جديد
يعرف قيمة أنه عضو نافع ف البلد ولو حتى بدبلوم
بس يحس أنه إنسان
في زمن بابجي الغلبان
تابعونا علي صفحة الفيس بوك
