فيه ثقافة بتنتشر زي السرطان في مجتمعاتنا العربية والإسلا.مية من فترة بسيطة وهدفها اننا ننسلخ عن جزء مهم جدا في عقيدتنا المقدسة، وثقافتنا كعرب مُسلمين, الثقافة دي بتنتشر من خلال الجماعة بتوع عِلم النفس والمنطق اللي شغالين اليومين دول على نغمة:
“متساعدش حد وركز مع نفسك”
“متعملش أكتر من اللي مطلوب منك”
“اتعلم تقول لا ومتجهدش نفسك عشان الناس”
“صحتك النفسية أهم من مشاعر الناس واتعلم تبقا جاني مش ضحية”
“متضيعش وقتك عشان تساعد حد، وقتك مهم”
وأكيد عدى عليك فيديو أو بوست بفكرة من الأفكار دي, والحقيقة اللي عايزك تفهمها كويس وهيخبوها عنك إن ربنا خلق ناس معينة عشان تقضي مصالح العباد ووعدهم بأجر عظيم جدا..
الحقيقة اللي هيخبوها عنك إن رسولنا الكريم قال:
“إن الله في عون العبد ما دام العبد في عون أخيه”
وهيخبوا عنك الحديث اللي بيقول::
“من نفَّس عن مسلم كربة من كرب الدنيا نفَّس الله عنه كربة من كرب يوم القيامة”
وهيخبوا عنك الحديث اللي بيقول:
“مثل المؤمنين في توادهم وتراحمهم كمثل الجسد الواحد إذا اشتكى منه عضو تداعى له سائر الجسد بالسهر والحُمى”
وهيخبوا عنك إن “صنائع المعروف تقي مصارع السوء” يعني الستر ورفع المصايب والأزمات والكوارث هتحصل معاك بفضل وقوفك ومساعدتك للناس بالمعروف اللي ممكن يكون نصيحة, كلمة, مبلغ, سلف, ابتسامة..
وهيخبوا عنك إن أحب الناس إلى الله أنفعهم للناس, وإن أحب الأعمال إلى الله إدخال السرور على قلب مُسلم..
هما عاوزينك مسخ, معدوم المشاعر, خبيث, قلبك اسود, ودايما هيصدروا المَثل القائل “خيرًا تعمل شرًا تِلقى”
وربك عاوزك هين, لين, بتساعد الناس, عشان الجنة اتفتحت للناس دول, وحط في اعتبارك دايما, إنك بتساعد الناس وبتعمل الخير ابتغاء مرضات الله مش لأجل الناس, عشان يوم ما حد يرد المعروف بالاساءة متزعلش, انت مستني الأجر من الله, مش من الناس, وأجر ربنا عظيم, أعظم مما تتخيل.. متخليش حد يضحك عليك..
تابعونا علي صفحة الفيس بوك
