اختار صاحبك صح

في ابتدائي كان معايا بنت اسمها وسام.. في الحقيقة وسام مكانتش شاطرة خالص ، وعلي طول كانت تيجي متأخر ، ومكانش ليها صحاب ودايماً لوحدها ، ومفتكرش اني شوفتها بتضحك قبل كده..

وسام كانت بتعمل شعرها ضفيرة ف كان بيبوظ شكله وبيبقي وحش رغم ان شعرها جميل ..

مستر الانجلش كان بيحب يطلع اللي بيجيب درجة وحشة ويتريق عليه ، يعني مكانش بيضربهم عصايتين وخلاص.. لأ كان بيطلعهم يضحك عليهم الفصل كله.

وسام كانت كل شهر بتجيب درجة وحشة وبتطلع عشان الفصل كله يضحك عليها..

كمان كانت اي مشكلة في الفصل مجهول صاحبها تلقائي كانت بتلبسها رغم انها ملهاش دعوة باللي حصل..

وسام كانت كل يوم بتقابل واقع مرير وكل شهر بتُستنزف معنوياً..

لحد ما في مرة والمستر مطلعها قدام الفصل يتريق عليها فيه بنت قامت وقالتله ” حرام عليك يا مستر ، وسام بشوفها كل يوم في المرواح قاعدة لوحدها بتعيط ”

المستر مسكتش وكمل تريقة عليها..

لما الحصة خلصت ،البنت ديه راحت قعدت مع وسام واتكلمت معاها ، ونزلت معاها الفُسحة ، وبقوا صحاب ودايماً بقينا نشوفهم مع بعض..

وسام لأول مرة اشوفها بتضحك.!! وبقت تيجي الطابور بدري ايدها ف ايد صاحبتها..

جت حصة الرسم والمِس طلبت مننا نرسم موضوع مُعين..

وسام رسمت اجمل رسمة شوفتها لحد ممكن يرسمها في السن ده.. بس مكانتش في الموضوع اللي المِس طلبته!!

وسام كانت راسمة جنينة فيها ورد وكان فيه كرسي كبير من بتاع الجناين ده.. قاعد عليه بنتين ، واحدة سايبة شعرها والتانية عامله ضفيرة..

البنت اللي عامله ضفيرة بتعيط والبنت التانية حاطه ايد عليها والايد التانية ماسكة دبدوب قريب منها كأنها بتلاعبها.!!

المِس انبهرت بالرسمة وقالتلها “انتي شاطرة اوي يا وسام، انتي اللي رسمتيها.!! ”

قالتلها “ايوه انا رسمتها، ودينا لونتها”

بقي كل حصة وسام بترسم ودينا بتلون..

وسام كانت صاحبة اجمل رسومات في الفصل ومع الوقت بقت رسوماتها اجمل.!

جه امتحان الانجلش بتاع الشهر وسام نقصت درجة واحدة وكانت الاولي علي الفصل!!

طبعاً المستر مش مصدق ازاي ده حصل!

مسبهاش وفضل يقولها انتي غشيتي وازاي جبتي المجموع ده .. و فجأة في وسط عتابه لوسام الفصل كله لا ارادياً قام سقفلها..

وسام وقتها ضحكت وقامت حضنت دينا صاحبتها..

المستر طلع شوكولاتاية واداها ليها عشان يصالحها ..خدتها منه وبعد الحصة قسمتها مع دينا..

وسام وهي مروحة اليوم ده فكت شعرها، وسرحته زي دينا صاحبتها وقد ايه شعرها كان جميل.. وخرجوا هما الاتنين من المدرسة وهما ايديهم في ايد بعض..

وسام طلعت الاولي علي المدرسة.!!

دينا.. كانت كل اللي احتاجته وسام عشان ترجع لحياتها..

الصُحاب لو اخترتهم صح هتنجح في حياتك وهتنجح في شغلك وعلاقاتك الاجتماعية ودراستك..

صاحبك هو ضهر ليك مش ضغط عليك، هو اللي يقف جنبك وقت ماتكون لوحدك ، صاحبك لو كويس هيخليك أحسن منه..

صاحبك هيخليك تعيش الحياة مش مجرد فترة تقضيها.. هيقدر ينقلك من عالم لعالم تاني..

بس انت اختار ، اختار صح.♥️

تابعونا على صفحتنا الفيس بوك