كتب حنان محمد
مولد وصاحبه ساكت
ابنى قاللى .. يابه جبلى .. حصان حلاوة
فوق منه فارس..وف راسه لابس.. سلطانية من حديد
بسمته الفجر الجديد
وف ايديه ماسك بقوة .. رمح عامل زى نبوت الفتوة
والمروة من طباعه .. شمس بلده لون دراعه ..
رمل أرضه فى نن عينه وبين رموسه ..
ولا أى خوف فى الكون يحوشه ..
في القلة دى هتلاقي يابا القرشينات .. هاتلى بيهم الحصان ده.. لاجل أخلى الفارس المغوار بهمة يركبه .. ويعدى به كل السدود ..
أصل عزمه .. مالوش حدود..
ياللا يابا خلى فرحة عمرنا في ايديك تعود ..
يابنى طلبك .. قصدى حلمك .. صعب تتحصل عليه ..
هيفيد بإيه .. انك تجيب تمثال من السكر و تتفرج عليه..
لو يوم طردنا خوفنا من جوفنا … ساعتها هتلاقيه ..
لو يوم فتحنا بابنا للريح القوى ..راح نصحى تانى بعد موتنا .. ونلقى صوتنا صبح قوى .. وساعتها يابنى هنلاقيه ..
خد قلتك يابنى .. وفيها القرشينات ..
ده الأمل في قلوبنا مات ..
رغم اننا عايشين في مولد من سنين ..
لكننا .. عشقنا السكات…
