كتب حنان محمد
أبو الكيوف
يا ابو الكيوف قولي من الهم ايه صابك
وليه بقيت قصه وحروفها في كتابك
دي القصه بدأت جميله والمسك عطرها
قالي هقولك حكايتي والحكم لجنابك
كان عودي اخضر بيبهر والكل ناظرني
حاوطوني اهل الغرض. كدا مكرهم صابك
أخدوني اسهر معاهم وقالولي ماتجرب
وفك هم الدروس واقعد مع اصحابك
كان الكلام ملبن غطى الشيطان سمه
ياعم نفسين يعدوا….. يا نغه ايه نابك
والزن سحر الودان وقولت راح اجرب
تقولش بكره وكرت جريت علي اعتابك
ابيض وازرق غطيس والهبو بقى بدره
سطر وهات جرار يخط في خرابك
أصبح خضاري صفار والعود بقى خشبه
والصحه عجز شبابها وكأنه ما شابك
بأيدي ضيعت مالي والكيف سرقني
وبقيت اثبت ناس. طلع ياروح خالك
ومره مسكوني العساكر وهناك حبسوني
والقاضي شافني وقال السجن دا عقابك
كلبشني في الترحيل وروحنا ابو زعبل
وهناك أخذنا دروس ما الحظ في ركابك
وشفت أشكال غريبه وفعلهم اغرب
تبقى مابينهم ملاك تلقي الشيطان جارك
وتبقى مجرم قراري في الكار ومعلم
وقالوا يا ابو الكيوف احنا هنا رجالك
ما تقولي ايه رايك في حياتي وصراعها
وجاني ومجني عليه. مستني اقوالك
يارب يا غفار بمقام حبيب مختار
ابعد شيطان الكيف عن كل احبابك
