كتب حنان محمد
محتار
محتار يارب السكة فين دلني
كل اللي احبه بيستغل الحب ويذلني
تايه في دوامة الرجوع
وسفينتي زَقَة مابينها ومابين الغَرَق
قمصاني دابت م الدموع
مع انها مدابتش يوم م العَرَق
محتار يارب المرة دي بالذات
مشتاق للحظة من اللي في البدايات
أوقات تمر ياقسوة الأوقات
والقلب ساحة حرب مليان دبابات
معرفش حاسس ليه بإني شهيد
بكتب لمين ؟ معرفش بالتحديد
الأزمة اني بحس نفسي سعيد
مع كل لحظة بتبقي فيها بعيد
وبتبقي دي مقصدش بيها انتي
فمتزعليش يا سفينتي ومرايتي
ومتخلصيش يا حياتي وحكايتي
انا برضه مقصدكيش يابحر
نزلت فيه مشتاق يغرقني ويادوب بَلِّنِي
محتار يارب السكة فين دلني
