كتب حنان محمد
حياة بلا آمال
عمر قلبك ماكان جامد
مشيتي ازاي وسايبة خمسة
بيعيطو ف وقت واحد
لما قالو ان امي ماتت
واني خلاص بقيت يتيمة
دورت ع الدمعة اللي نزلت
واستخبت ف هدوم قديمة
ياام اجمل ابتسامة
الحزن علمني بعلامة
ياللى ياما وياللى ياما
وانكتب اشعار كتير
واصلة لسمانا بدراما
للى عايشة واللي ماتت
بس مخنوقة بغيامة
ماما
ياللي ياما شديتي حيلي
جيتي دلوقتي تكسريني
عاوزة اقولك كلام كتير
عاوزة اقولك اي حاجة
بس تبقى بتسمعيني
قلبي عاوز يقولك سر
انه واخد نفسه بالعافية
والمفروض اننا بكتب شعر
وشغلانتي بتكون القافية
انا بالعافية بكتب اهات
ويدوب الورق بيكمل عياط
وبيسألوني مين اللى مات
ماما
ياللى كنتي بتسلفي للشمس نورها
الشمس مستنية دورها
ونورك اللى ياما نور بيوت
البيوت بعدك تابوت
الجموع بعدك وحيدة
ليه في كل حاجة دايما عنيدة
وف وداعك تستسلمي
طب كنتي حتى سلمي
قبل الوداع
قبل ما يقولو دي مشيت
والخبر بقا ع المشاع
ياللي اخترعتلنا الجمال
ياللى صبرك حرك جبال
ياأمال
يابخت الجنة بيكي
يابخت الملايكة
بلقاكي
يابخت كل حاجة هتلمسك
وتلمسيها
يابخت كل دعوة بتسمعيها
مشيتي قبل ما نخلص كلامنا
وقبل دعواااااات كتير
لسة محتجاها منك
ااقولك
لسة محتاجة اني اسمع
تيجي يابنتي بالسلامة
ماما
فيه خانات كتير ملحقتيش تسديها
فيه لسة بنوتة
ملحقتيش تربيها
فيه لسة عيل اتيتم معايا
ويقولي عاوز اروح لتيتة
فيه الف سور
فيه الف حيطة
كنا نتسند عليها
وخلاص وقعنا لما مالت
لما قالو ان امي ماتت
قلت خفت من وجعها
فرح سالب او حزن موجب
برضو دمع في يوم وداعها
لما قالو ان امي ماتت
قلت ماما خلاص ارتاحت
وقلبي هيتعب حبتين
من ضمن اوجاعه اللى فاتت
بس اللى ياما سلفت للقلب نبضه
شالت النبض في قلوبنا
واللى عاشت عشان تطبطب
كفها اتشال عن كتافنا
ياللى بوداعك عجزنا
والعجز مراية لسنين
كل لما اقول ياماما
التفت واسأل دي فين
حزين الليل اوي
والنهار طالع اوي
بس لابس عليكي اسود
كل حاجة لابسة اسود
الشوارع لونها اسود
والعيون بقا لونها اسود
والقهاوي والحكاوي والغناوي
بقا صوتها اسود
وانا حزني بقا اسود ف اسود
الليل حزين اوي
وانا زعلانة منك اوي
افتكرتيني خلاص كبيرة
وممكن اتحمل غيابك
ومات في قلبي ناس كتيرة
فهتحمل كمان مماتك
بس فاتك
ان صبري دا محاولة
اقلدك لو نص صبرك
ولو ف يوم شديت ف حيلي
ووقفت ادعيلك ف قبرك
دي محاولة ان ابقا زيك
مهما هتأمل ملامحك
مهما يخنقني السكات
مهما توجعني الاماكن
اللي شاهدة ع اللى فات
وحشتيني
كفايا كدا
هبقا اكمل كلامي عياط …
