كتب حنان محمد
الضى والتوهان
قلب الوجع
شجرة زيتون مفرووط
مبدور على
وش الجراح والموت
متسرسبة الأرواح
فى غيط الدم
مين المسافر جوَّه قلب الآه ؟؟
مين اللى بايع للنشيد والأرض !!!
حدوتة ممطوطة …
شط النهار ضايع مع الغربة !!!
جفن الليالى معبِّى بالديناميت !!!
عشمان ياروح الأرض تخْضرِّى
بعد اللى راحوا والدما غليان …
قلبى انقسم مصابيح
والضى ساكن جوَّه بحر حداد
قلب الوجع بيكفن الرايحيين…
بشويتيين الحزن والتهليل
وبيطرح الأولاد…
والموت فى كف الإيد
قبل العيون والقلب
ويا أقصى يا مأسور
بعد انكسار الضاد
ضهر الحصان مكسور !!!
وإيديَّه ولجامه…
بينادوا ع التايهيين
بعد اللى طاروا
فوق جناح الخلد …
مين اللى كاسر ضهر خيَّالنا ؟؟
مين اللى فاتح للعدو طاقة …
بيخش جوَّانا.. يقطف قناديلنا
وبدال مواويلنا …
غنَّى الحريق يا قدس
غنوة زيتون مجروح
بتمرجحه الصواريخ
ويا قلبى يا حزنان
خايف لبكره يكون كما امبارح
ونزف أرواحنا …
جوَّه الصريخ المر والتعديد
ييجى الربيع
شعلة دمِا بتزيد
ييجى الخريف .. توابيت
للفرْح والسيف البليد خالص
خايف لتتبعتر …
الأرض فوق نجمة بست سنان
والشمس تقتل ضيها بدرى
ونخش فى سكة نزيف عميان
خايف لروح الثورة تتدارى
تحت السما البايشة من التوهان!!!
ويا سكة الأحزان …
قلب الوجع شجرة زيتون بتميل
راصَّة على وش الجراح قناديل
قلب الوجع مكسوف …
وانا عشمان…
عشمان ياروح الأرض تخْضرِّى
بعد اللى سافروا والدِما غليان
قلبى انقسم مصابيح …
والضى ساكن جوَّه بحر حداد
قلبى انقسم عناقيد …
والدم بالمسك الندِى فوّاح
وف سكة الرايحيين
متسرسبة الأرواح
والأرض .. دم وزعفران مش طين
متسرسبة الأرواح .. فى بحر الدم
م ت س رس ب ة
م ت س ر س ب ة.
