حبة نور
انتزاعهم من جوايا كِيف
يكملو مشوارهم للسما
استعطاف
لكن بدون تزييف
حبة نور
هزموا الضلمة جوايا
نزلو دستور جديد للكون
لكن بدون تحريف
لغبطة مشاعر مش عارفة طريق الهروب
من عنيك لعنيك
تتألف الروايات
ويتمددوا الصبايا تحت رجلين الأمير
يحتاروا العرافات
منين اتخلقت الصبية
بضفيرة بني
وعيون عسلية
وجودها كان تخاطيف
تخطف من وسط الجيوش
قوتهم
وتغرز في قلب غروره السيف
لو كلامك كلام عيون
سابق اوان الكلام
فكلامها كان تخاريف
لحظة عيون الحلم مادمعت
كان قلبها
حلوة عن لهفة البدايات وقسوة النهايات
مليان زغاريد ونايات وحاجات ومحتاجات وحاجات كتير حلوة عن لهفة البدايات وقسوة النهايات ودنيا بكاية بتعجز الشابات
ومواويل بتتغني وكلام ملوش معنى عن وصف جنية طلعت من وسط غيطانك
تزرعك ورد ورياحين
مكناش رايحين .. لكن هزمنا زماننا بالرجوع
فوقفنا في مكاننا وهزمنا أحزاننا
ومن وسط اوجاعنا
خلقنا مكان للعيون
فردنا سجادة صلاة روحنا ودخلنا في الموضوع
مش شرط عينيك تكون دايما القبلة
مش شرط لما أدعي تأمن ورا دعائي
متعشمنيش باللقمة وألملم ف بواقي
عاوزك تكون لي شمس
خالية من الحرقة
عايزاك تكملني ولو بكمال سرقة
مش عاوزة اكون كاملة
تطلع من قلبي الفراشات
اصل الكمال لله
انا عاوزة لما انطقك
تطلع من قلبي الفراشات
انا عاوزة لما ألمسك
تعلم روحي العلامات
سما وبتنقسم وبتقولي انقسمي
انا عاوزة لما اندهك
أنده على اسمي
تبعونا على صفحتة الفيس بوك
