كتب حنان محمد
لقاء بين أنقاض الانتصار
شفته ماشي (فْ) قلب غزه
واندهشت انا منه خالص.
مش عشان ده شخص فاتنا.
لا عشان حسيت سعادته
رغم دمعُه.
وسط أنقاض المدينه
وسط ناسنا البردانين..
وسط أحبابنا اللي راضيه
اب حاضن حب عمره
طفله مع أم بثبات.
رغم أهوال الغارات.
رغم احقاد الأفاعي..
برضه لسه بيزرعوا..
حب ورثوه (مِ) النبي
ومن سادتنا المرسلين
من صحابة وتابعين.
أصلهم عاشوا (فْ) ديارهم
عبر آلاف السنين.
قلت لِيه انا بدِّي اسال:
يا زعيم حاسك حزين.
بس قول لي السر إيه
إني حاسس بابتسامة قلب مخلص..
قلب نابض بالمحبه.
قلب دايما كان مرفرف..
لما كنت سنين سجين؟
قال لي انا شفت المحبه
والمقاومه والأماني.
وسط آلام المدينه.
سطر أجمل من سطورنا
في بريتوريا
مره تاني ينكتب بيه للتاريخ
فصل في كتاب العزيمه
فصل يثبت إن ناسكم
هم دول اللي هيمحو
كل عار الإنسانيه
من جريمة الصهيونيه.
فصل يثبت إنهم أحفاد محمد
اللي انا لما قريت عنه زمان
قلت إنه شخص رائع
شخص مؤمن بالمحبة
والمحبه.. هي غاية المرسلين.
هي مضمون الشهادة
للإله اللي خلقنا
وهي كنز العابدين.
قلت انا مبسوط لأني
شفت مانديلا العظيم.
بس برضه شئ محير..
إن صاحبي في بريتوريا قال لي إنه..
شاف جيفارا ويا أستاذه المجاهد..
ابن ريف مغربنا* شاهد..
(عٌ) القضية.
اللي رافعاها بلادكم في لاهاي.
برضه واحد تاني أقسم
إنه شاف قسام** بيمشي..
في مظاهره (فْ) قلب لندن.
واحده قالت:
إنها والله شافت يوم شبيه..
غاندي يهتف في الجزاير..
و(فْ) باريس آه وفي اليابان..
شافوا مكرم*** والجزايري الأمير***.
قول لي إيه جمع يا قائد
فجأة كل الأساطير؟
راح مجاوب بابتسامه جميله هاديه.
وبعلامة نصر شاور قام مروَّح
والله دي أجمل إجابه..
تغني عن كل الكلام.
والله دي اجمل مقابله..
بهدي انا لروحك سلام.
الغردقة
١٢-١-٢٠٢٤
* محمد بن عبد الكريم الخطابي مناضل مغربي يعد من أشهر زعماء المقاومة الذين غيروا تكتيك حرب الشوارع حتى ان جيفارا المناضل الكوبي الشهير في زيارته لمصر (منفى الخطابي الاختياري) قال له جئت لأتعلم منك.
** محمد عز الدين القسام داعية ومجاهد فلسطيني
لعب استشهاده دور كبير في إشعال الثورة الفلسطينية الكبرى (١٩٣٦-١٩٣٩) وتنسب إليه كتائب القسام وهي الجناح العسكري لحماس.
*** عمر مكرم زعيم شعبي مصري شهير كان نقيب الأشراف وله دور كبير في مقاومة الفرنسيين في ثورة القاهرة الثانية عام ١٨٠٠ وتولية محمد علي حكم مصر.
**** الأمير عبد القادر بن محي الدين المعروف بعبد القادر الجزائري قائد المقاومة الشعبية الجزائرية ضد الاحتلال الفرنسي ويعد رمز المقاومة الجزائرية.
