كتب حنان محمد
#حكايات_شاي_بالنعناع
من فترة بتكلم مع بناتي عن الحيوانات المفترسة.. الأسد والذئب تحديدا.. وسألتهم سؤال عايز اطلع منه بحكمة يستفيدوا منها:
– مين ملك الغابة؟ الأسد.. شاطرة
– طب مين الأقوى الأسد ولا الذئب؟
بنتي تقى ردت بسرعة: الأسد طبعا!!
بنتي رقية قالت:
– انا معرفش.. انا عمري ما شفت ذئب..
قلتلها: وعمرك ما شفتي أسد..
طبعا هي استندت لرؤيتها الأسود في حديقة الحيوان.. لكن انا شرحت وجهة نظري.. قلتلها:
– اللي في الجنينة دة مش أسد.. دة كلب مريض لابس لبس أسد.. الأسد الحقيقي عمره ما ياكل لحم ميت.. عمره ما ياكل جيفة.. الأسد الحقيقي عمره ما يعيش في بيئة قذرة وريحتها وحشة كدة.. ودة الفرق بين الأسد والذئب..
سألتهم:
– رحتوا السيرك؟ قالولي: آه..
وقعدوا يحكولي عن الحاجات اللي شافوها والفقرات والساحر والحيوانات وغيرهم..
وفي خضم كلامهم انا سألتهم:
– ازاي الأسد مع جبروته وقوته وضخامته وشكله المرعب دة.. ويطلع يعمل فقرة ويرقص مع المدرب وينط حبال والحاجات دي!!؟ ازاي حد محترم وجد وبيتعمله مليون حساب يقلل من قيمته بالشكل دة؟
رقية قالتلي: دة متدرب.. ومتعلم انه (يطيع) المدرب بتاعه..
قلتلها: صح.. بس ليه بيسمع كلام المدرب؟ ليه بيطيعه؟
قالتلي: عشان بيضربه..
قلتلها:
– تمااام.. يعني بدافع الخوف..؛ طيب برغم ان الذئب أصغر حجما من الأسد.. وأضعف منه.. لكن ليه مش بنشوف فقرة للذئب في السيرك؟
لما احتارت في الإجابة قلتلها: عشان الذئب مابيخافش.. الذئب عنده استعداد يموت قدام عدوه لكن مايتنازلش أو يتراجع.. الذئب قوي بعشيرته ودايما محاط باللي من نفس طبيعته..
أيوة الذئب بيخاف من الكلب.. بس دة خوف طبيعي ربنا اللي عمله جواه عشان الكلب بيحرس القطعان والبيوت والمزارع..
في النهاية قلتلهم:
– خليكوا دايما محاوطين بعض.. احموا بعض واسمعوا من بعض..
اوعوا تخافوا من حد أو من حاجة.. الخوف بيخلي الشخص يعمل حاجات تقل من كرامته وتهز صورته..
اجبروا الناس تعملكم حساب.. ودة مش هيحصل غير لو بقيتوا جد وقت الجد وقلتوا الحق دايما..
خلى اللي جواك دايما ظاهر للناس.. الشخص اللي معندهوش حاجة يخبيها هو اكتر شخص صعب يتكسر..
وحاجة أخيرة قلتهالهم:
– ياما ناس تشوفوه تقولوا أسد وهو آخره أراجوز أو بلياتشو
