كتب حنان محمد
ايام
تروح ايام وتيجى ايام
ولا نحصدش الا كلام
ماهش فارقه ولا غارقه
كلام فارغ كلام مليان
ما كله كلام
ولا ينفع عليه نتلام
ولو ينفع الوم على مين ؟
وكام مره وكام نوبه ؟
وانا اللى شايفها مقلوبه
بتتقلب وتتشقلب على الجمبين
ولا حدش واخد باله
ولا خايف على عياله
ولا يهمه خلاف ماله
دا جى منين ورايح فين ؟
لابيدور على ولده ولا بلده
ولا ع الفقرا والمساكين
وهمه كله ع التخزين
عشان السعر يطلع فوق
عشان يهدا ودمه يروق
ويعلا السهم فى البورصه
ويفضل دمنا محروق
مالوش دعوه ولا داعى
يبيع جمله وقطاعى
وف جيوبه يلم السوق
وتبقى الدنيا سياره وهو يسوق
يسوق بيها
يسوق فيها
ماهو الراكب على الصندوق
وحط ف جيبو مفتاحو
فاليه الخلق يرتاحو ؟
بدون ماتدوق
وياكلوا العدس بالشطه
وبالفلفل وبالخلطه
ولو كان الهوا مخنوق
فما تقوليش ولا تلومنى
ولا تسال عن الاحوال
ولم الدنيا دى ف شوال
وشيلها ياعم على كتفك
ولا تحقق ولا تدقق
ولا تقول لى منين المال ؟
انا مالى ومال الناس
ولا القته ولا القلقاس
ولا بالقهره والمهره
ولا المحتاس
ولا الفايظ ولا العايز
ولا الشحات
دا موش عيبى ولا ذنبى
اكون متعبى بالدولارات
وف يمينى الدهب بالكوم
وف شمالى جبال الماس
ولا عيبى اكون جوكر
واعبى الكل فى القرطاس
واقرطسهم واغطسهم
فى سوق حره
وسوق مره
كفاياكم وجع فى الراس.
