إيه حيفيدك م التفكير
يلى فى حال الكون بتفكر
إيه حيفيدك م التفكير
عيشتك. غم وتعكير دم
وشايل دايماً هم كبير
ليه مشغول بهموم الدنيا
دا للى خالقنا رب كبير
سيبها على الله وسلمهاله
راح تلقاها بأمره تسير
★ إيه حيفيدك م التفكير ★
ليه بتشيل الهم وسارح
تاعب نفسك ليل ونهار
ماتسيب بكره زى إمبارح
قوله يعدى ليه تحتار
لو تتركها تعيش متهنى
سلم أمرك للستار
سيبها على الله دوغرى قوامك
راح تلقاها بأمره تسير
★ إيه حيفيدك م التفكير ★
إوعى تفكر إنك تقدر
مره تغير فى الأكوان
لأ دا نظام مرسوم بالقدره
صنع إله واحد رحمن
ربك هو اللى مسيرها
نافذ أمره فى كل أوان
هو الخالق هو الرازق
واحد من شأنه التدبير
★ إيه حيفيدك م التفكير ★
حب بلادك واسعد ناسك
خلى ضميرك يبقى نضيف
أدى شروط الدين بأمانه
وخليك بين الخلق خفيف
إرضى المولى وسلمهاله
هو اللى بإيده التصريف
ماتفكرش إن بإمكانك
مره تيسر أى عسير
★ إيه حيفيدك م التفكير
تابعونا علي صفحتنا علي الفيس بوك
