شوفني
يمكن تشوف
عيون مكسرهاش الزمن
عيون مش مدفوعة التمن
يمكن عليها تؤتمن
او تناديها فتجيلك
وتبقا هي بديل ليلك
ويمكن امك تدعيلك
فتكون من نصيب نظرتها
شوفني
يمكن تشوف قلب مليان اصابات
ملفوف بشاش وعليه علامات
ممنوع تقرب وممنوع تبعد
ممنوع تسمح ممنوع تطرد
ممنوع تحود
او تعدي بيبان قلبها
من غير اذن مرور
ممنوع تشيله مابين ايدك
ليتفرفت مكسور
شوفني
يمكن تشوف رجلين شايلين الحلم الهلكان
يمكن تشوف حلمين ف سبيلهم للإمكان
يمكن تشوف الطفلة
يمكن تشوف القسوة
تاخد نظرة على غفلة
او تصدمك بالقوة
شوفني
من ورا إزاز نضارتك
او من ورا الشاشات
شوفني ف مكالمة رقيقة
عكست ضحكة على الشات
شوفني من غير حكايات
كيان حزين شفاف
حاجب نفسه عن نفسه
كيان مجروح خواف
حزنه جواه بينافسه
شوفني بعيون قلبك
يمكن لسة بكون بتشاف …
تابعونا على الفس بوك
