طـــلاق الــأفـــعى….طـــلاق الــأفـــعى

كانت صدمة لينا ما بعدها صدمة ومش عارفين ممكن نعمل ايه في الوضع ده, واتورطت خالتي فينا, وبالأخص اننا كنا داخلين على سن 16 سنة, يعني بدأت تظهر ملامح الانوثة علينا أنا وأختي, وبالأخص أنا اللي كنت جميلة جمال مُبالغ فيه, وظهرت عليا ملامح انوثة من بدري أوي, ملامح بتقول اني هكون البنت اللي مجبتهاش ولادة بالفعل, وبدأت المشاكل لما جوز خالتي بقا بيبصلنا بصات غريبة كل شوية, بس تركيزه الأكبر كان عليا أنا, ومن تغيير المعاملة كلنا فهمنا مرة واحدة إن الموضوع مُخيف وغريب, وإنه عايز حاجة غير أخلاقية مني, ومسافة ما خالتي لاحظت ده تاني يوم كانت طردتني أنا وأختي من شقتها للأبد..

ومكنش فيه حل غير إن أختي تتعامل معاملة الرجالة وإلا هنتداس أنا وهي في الرجلين, لمينا كل ما نملك ودفعناه مقدم إيجار شقة صغيرة في مكان متواضع, وأختي جابت مكنة الخياطة بتاعت أمي, وقررت تشيل البيت, وإن الماكينة دي هتبقا مصدر رزقنا لحد ما الدنيا تبقا كويسة, وفعلا بدأت تتعلم بسرعة الصاروخ, وكانت بتصمم فساتين وتلف يوميا في مناطق راقية تعرضها على ستات بيوت وسيدات مجتمع, أختي كانت شاطرة بطريقة مُبالغ فيها, وفعلا قدرت تكسب ثقة ناس كتير من الشغلانة دي, وكانت بتاخد أضعاف مبلغ شغلها لما تعمل شغل حلو لأي واحدة منهم, لحد ما بدأت الدنيا تضيق علينا واحدة واحدة من ناس مش عايزين أختي تكسب تعاطف الناس دول ويبقا معانا فلوس, الناس كانوا عايزين يقيدوا حريتنا تماما, عشان كدا بدأوا يطلعوا علينا كلام مش حلو..

لأن الكل اتقرص مننا ومحدش عرف يجي على سكتي أنا وأختي, لحد ما في يوم أختي قالتلي انها هتعمل حاجة محصلتش ومحدش عملها قبل كدا, حاجة هتخلينا نغتني ويبقا معانا فلوس نجيب شقة كبيرة ونبعد عن المنطقة الزبالة دي, عملتلي فستان زي بتاع الأغنياء, وجابتلي ميكاب, وبقت بتاخدني عند الستات في المنطقة الراقية اللي جمبنا, وفعلا شوفت نظرات الاعجاب والانبهار بيا وبجمالي, لأني كنت ملفتة للنظر جدا, وإلا مكنش كل شباب المنطقة حاولوا يرتبطوا بيا..

وفعلا بدأت واحدة منهم تسأل عني باهتمام, وطبعا أختي كانت بترد ردود احترافية, لحد ما طلبتني لابنها, ناس من مكانة اجتماعية تانية خالص, ودنيا تانية وفلوس أكتر, وضع مختلف وحياة جديدة, والغريب إن الناس كانوا متمسكين بيا أوي, متمسكين بطريقة غير طبيعية, واختي اشترطت عليهم مقدم ومؤخر بمبالغ كبيرة أوي وبرضه وافقوا, كان وضع غريب, وفعلا اتخطبت للشاب ده وعملنا فترة خطوبة طويلة شوية..

وكانت أختي بتخليني استنزفه, موبايل, هدايا, فلوس اشتراكات, مكنتش أتخيل في حياتي كلها انها موجودة من الأساس, وبعد فترة الخطوبة الطويلة أوي دي كتبنا الكتاب ودخلنا عش الزوجية, ومسافة ما دخلنا جوزي فشل تماما انه يقرب مني, معرفش كان شايف ايه, بس فعلا فشل فشل ذريع, وهددته أختي اما يطلقني أو هتحكي كل اللي حصل, معرفش من امتا جابت السلطة الضخمة دي انها تهددهم, ومن خوفهم وقلقهم تم الطلاق بعد اسبوع في صمت تام وخدنا كل حاجة, مؤخر كبير كان كافي اننا نجيب شقة في مكان كويس, وفورا أختي خدتني وسبنا المكان كله للأبد..

وروحنا في منطقة راقية تانية, وبدات أختي تعرض تصاميم اللبس على الستات, وكان عندها قبول غريب, وشوية وبدأت تعرضني عليهم وشوفت نظرات الاعجاب من تاني, طيب هي متجوزة, اتقال انها متخطبتش أصلا, وكانت أختي دافعة في الشهر العقاري عشان متسجلش متجوزة, وفعلا طلبتني واحدة ست لابنها, واتخطبنا, واشترطنا عليهم مبالغ كبيرة ووافقت برضه, وبدأت أختي تأمرني أمر إني أطلب منه موبايل, وهدايا, وفلوس اشتراكات كبيرة أوي, وكأنه بنك وانا مطالب مني استنزفه استنزاف كامل, شوية وحددنا ميعاد كتب الكتاب وكتبنا مؤخر كبير أوي..

ودخلت مع عريسي لعش الزوجية, ومسافة ما شاف جسمي بدأ يتوتر, ويتشنج, وتظهر عليه تغيرات غريبة أوي, وفشل فشل تام في إنه يقرب مني إطلاقا, وأختي بهدلته, طالما انت مريض بتتجوز ليه, وهددته بالفضيحة وسط الأوساط بتاعتهم لأنها تعرف كل قرايبه, أو يطلق في صمت ويدفع, وفعلا طلقني ودفع مبلغ كبير, وبعنا الشقة واختفينا من المنطقة تماما..

وبدأت أختي تكرر نفس الموضوع للمرة التالتة, بعد ما بقا عندنا حساب في البنك, وشقة كويسة, وفلوس نعيش منها عيشة مرتاحة, وبدأت أختي تصمم لبس جديد, وتدور بيه على الستات الأغنيا في أماكن مختلفة, شوية ولما كسبت ثقتهم بدأت تكشفني قدامهم, أنا أختها اللي متجوزتش إطلاقا, وشوفت من تاني نظرات الانبهار والسعادة الحقيقية, وبدأت واحدة تقرب مني عشان تطلبني لأخوها, وكانت الشروط اياها, مؤخر ضخم ومتطلبات كبيرة, وكل حاجة الناس وافقوا عليها تماما..

واتخطبنا وبدأت رحلة استنزافه من خلال أختي, موبايلات وهدايا وفلوس وهو كان سخي أوي معايا, وكانت كل طلباتي مُجابة حرفيًا, وكتبنا الكتاب وجت ليلة الدخلة, ودخلنا بالفعل وانا متوقعة ان كل حاجة هتحصل زي ما حصلت قبل كدا, بس الغريب إن جوزي دخل عليا بكل هدوء وسلاسة, وتاني يوم لما جت أختي ولقته مبسوط استغربت, ومبقتش عارفة هو ازاي دخل عليا, ولما سألتني بتوتر ان هل هو عمل كدا فعلا قولتلها ايوة ده حصل..

وبدأ يظهر عليها توتر كبير أوي, وعدت الأيام يوم بعد يوم والدنيا ماشية ما بينا كويس أوي, ولقيت أختي بتطلب مني أحمل في أسرع وقت ممكن, بس الغريب إني حاولت مرة واتنين وعشرة بس مكانش فيه حمل بيحصل اطلاقا, فضلنا على الحال ده يمكن سنة كاملة, وأختي حاسة انها هتتجنن..

لحد ما راحت أختي في مرة للبنك لقت حسابنا متصفر, رجعت زي المجنونة لقت جوزي في الشقة ومعاه ام واحد من اللي اتجوزتهم قبل كدا, وكانوا بيضحكوا وشمتانين فيها, جوزي قدر ياخد كل الفلوس من حسابنا, ويسرق القايمة وقسيمة الجواز, وياخد كمان شقتنا اللي قاعدين فيها ببساطة رجعنا لنقطة الصفر..

وعرفنا انه لما خطبني قريبته اللي هي الست ام واحد من اللي اتجوزتهم, شافتني, واستخبت فورا وحكتله كل حاجة, وفهم اللعبة, أختي كانت بتتعامل مع دجالة, بتخلي الناس يحبوها ويثقوا فيها أوي ويوافقوا على أي حاجة تتشرط بيها, وكانت بتخليهم يحبوني أنا كمان, وليلة الدخلة كانت تربط العريس, وترسم طلاسم وتعمل وشم مخيف على جسمي, ولما العريس يجي يدخل عليا يتخض من شكل الطلاسم وكمان يبقا مربوط, ولما يقول انا شوفتها بالشكل الفلاني كنا بنمسح الرسومات دي ويبان ان هو اللي مجنون, ونهدده وناخد فلوسه, لأن أختي مكنتش بتثق في أي راجل من بعد عملة أبويا, لحد ما وقعنا في الأخير, وعرف اننا نصابين, واتعامل مع دجالة فكتله ربط ليلة الدخلة, وتجاهل تماما شكل الرسومات المخيفة كأنه مش شايفها ودخل عليا, ومثل علينا ان كل حاجة تمام لحد ما قدر يرجعنا شحاتين, ورمونا رمية الكلاب وطلقني..

وكأنها رسالة لكل واحد اتظلم ومصبرش لوجه الله وقرر يظلم هو كمان، الدنيا ممكن تتعب المظلوم شوية، بس حتما ولا بد هتدمر الظالم تماما، فإياك تتظلم فترد الظلم لشخص مظلمكش من الأساس، لأن وقتها هتتساوى مع الظالم وهتدوق المُر..