قاعدة لوحدها
مستنية شروق الشمس
وبتحلم
يمكن تقابل حلمها
بس يكون في العلم
كان فيه حلم هنا
مسجون في عيونها
وتبص للبحر وهو بيزعق من سكاته المكبوت
وتبص ع الرمل السقعان أوي
ومع ذلك مبيهربش مهما يغرقوه
وتبص للقمر اللي بيسهر كل يوم ومبيزهقش
ويروح ينام غصب عنه
وتبص على النجوم المتشعلقة
محتارة مين فينا بيراقب مين
وتتأمل حالها
وحال كل اللي مشارك الوحدة معاها
وتقول يابخت العاشقين
ايديهم هناك متشبكة
قاعدين يسمعو للست
( الليل وسماه ونجومه وقمره
وانت وانا ياحبيبي انا ياحياتي انا
كلنا كلنا ف الحب سوا )
لا مش كلنا
لسعة البرد ترجفها
وتفضل محتارة
دي من السقعة وللا الخوف
وللا عياط مكتوم
( والهوا اه منه الهوا اه منه الهوا اه )
عمالة الساعة تترقص
مخبية عقاربها
كأنها حالفة
ماتخليها تحس بوقت
وهي فعلا مستسلمة للوقت
عينيها بتحوش كل مشاهد الموج المتعاد
حافظاها صم
وعينيها ع الشمس التايهة
المستخبية في مابين الضلمة والسحاب المنور
( ونقول للشمس تعالى تعالي بعد سنة مش قبل سنة )
الشمس فضاحة
الوشوش اللي كانت بتضحك
طلعت بتبكي من وجع الغرام
والايادي المشتاقين لحضن اللقا
طلعت بتسلم قبل الفراق
وعيونهم المليانة كلام بطول الليل
نزلت ع الخدود دمع مالح
طالع سكوتهم م البحر الحزين
اعلي من موسيقى الموج
( دي ليلة حب حلوة بالف ليلة وليلة)
وهنا ادركت شهرزاد الصباح
والسياف قطع رقبة الشماسي
بكراسي وعيال بتغير المايوهات
وبتاع فريسكا بينادي
وشاي وحاجة ساقعة وام الخلول
عيونها بتدور وسط اجسامهم المبلولة
على بقيت اغنية الست
لسة في عيونها بقايا من ضلمة
واقفة تتحايل ع الشمس الحامية
ابعتي الليل تاني بقا
يمكن مكونش من العاشقين
لكن احب اشوف ف عيونهم
لهفة ودانهم من كلمتين بيتقالو بالهمس
ودقة قلوبهم لما ارواحهم بتحضن بعض
احب اراقبهم وهما بيحسبوها بالثانية
( هو العمر ايه غير ليلة زي الليلة زي الليلة )
تسكت وتسرح بخيالها تاني
لحد ماييجي الليل
لما الست تعيد من تاني وتغني بعد تنهيدة طويلة
( ياحبيبي ).
تابعونا على صفحتنا الفيس بك
