رباعيات
سرحانه ليه
سرحانه ليه يا صغننه
بدرى عليكى تسرحى
انسى الهموم وانسى الألم
وبسرعه قومى وافرحى
رب العباد عنده الحلول
أحزاننا بيها بتتمحى
ادعيه يبارك خطوتك
يازهور حياتنا فتحى
النظره شارده
ولكل واحد دنيته
يسرح ويسأل وف لحظه يهدا
والكل راسم خطته
ولاحد يسأل مين اللى يقدر
فيهم يكمل خطته
شوف الوشوش من غير رتوش
يمكن تغير رسمته
الضحك والفرحه اللى غابت
حتى الطفوله نسيته
مين اللى خلاها اختفت
صبحت حطام متفتته
شيلوا الكٱبه من هنا
خللوا السعاده صيف شتا
افتح كتابك
بكرا هتدخل لامتحان
واياك شيطانك يغلبك
يقطع عليك نور البيان
ماكفايه نور المصلحه
مقطوع عليكم من زمان
والقهوه باتت مكتبك
انت وصحابك والجيران
ماهو طول حياتنا مضلمه
والخيبه طلت م البيبان
وعدا عليا هااخدمك
وهاوصى أهل البرلمان
ويارب يقروا شكوتك
ويقرروا تنجح كمان
تبعونا على صفحته الفيس بوك
