معلومات تهمك داخل مطبخ نبض العاصمة ووصفات المتنوعه لها خطوات صالحة لنهاية طبخة ممتازة وتكون مميزة
– الكريمة اللبانى بديل اقتصادى ليها كوب لبن معلقة دقيق معلقة قشطة وش اللبن معلقة زبدة أو سمنة قلبيهم على البارد وحطيهم على النار واستخدميها.
– الرز البايت جمعيه فى علبة فى الفريزر وسخنيه فى يوم حطيه فى مصفاه وغطيه وتحطيه حلة ربعها ميه وحطيه على النار يسخن على البخار بيبقى كانك لسه عملاه حالا.
– المكرونة بالصلصة لو بايته حطيها فى صينية وحطى على وشها اى جبن عندك وفلفل وزيتون ودخليها الفرن
من جمالها هيتخانقوا عليها.
– البصل هاتى نص كيلو قشريه وافرميه فى الكبة أو ابشريه بالمبشره حطيه فى أكياس بلاستيك وافرديه ودخليه الفريزر وانتى بتطبخى اكسرى قطعه هيوفر معاكى كتير.
– الثوم هاتى ربع كيلو ثوم وقشريه كله وحطيه فى برطمان ودخليه الثلاجة اى طبيخ فى اخر خمس دقايق اهرسى فص واحد وحطيه هيبقى كانك حطيتى رأس ثوم.
– الكفتة زودى عليها رغيف عيش مبلول ومتصفى وحطى التوابل والبصل ومعلقة دقيق وصبعى الكفتة ورصيها فى صينية ودخليها الفرن هيزود الكمية النص.
– الطماطم حطى ربع كيلو فى الخلاط مع معلقة صغيرة بابريكا واضربى كويس واطبخى بيها كانك طبختى بكيلو طماطم.
– البرجر على ربع كيلو اللحمة المفرومة زودى نص كوباية بقسماط ناعم والتوابل والبصل وشكليه كور وحطيه فى كيس مفرود واضغطى عليه واقليه فى قليل من الزيت هيكفى عيلة.
– البشاميل ٤ معالق دقيق ومعلقتين سمنة ومعلقتين زيت على نص لبن ونص شوربة وملح وفلفل اسود بيبقى تحفة ومفيش فرق عن البشاميل اللى بلبن كامل
– الشوربة الزايدة حطيها فى أكياس وعلى الفريزر هتنفعك تسقى محشى أو تعملى ملوخية أو اى طبيخ احلى من المرقة
تابعونا على صفحة الفيس بوك
