كل كلمة في القصيدة محفورة جوايا
محفوره جوايا
تحكي جراحك ياسينا
والدمع في بكايا
مش أنتي اللي قولتي
تعالى يا ضنايا
خدْ بأيدي وبأيدك الرايا
————
والله جيتك
والصّحبه ويايا
ميخائيل صومائيل أمير
كانوا جنبي ومعايا
جنود زي الأسود
قدامي وورايا
عشانك دمهم سال
ولسان الحال له حكايا
مش قادر انساهم
من وانا وياهم
ساعات اتعب لذكراهم
وساعات ارتاح في بكايا
خيالهم يندهني
يشغلني جوايا وبرايا
اللي شايل مدفع
واللي شايل رايا
——
ورجعتي تاني يا سينا
وبقيتي جوانا وانت جوانا
أمل قلوبنا في السما
متشعبط في نجمايا
والكل لبى الندا
رافع للسما الرايا
——
سبْـناكي عروسه
وِسْط كوشه وسعاده
محميّات ونباتات
في كل لون ومزايا
طيور عاملة م الشجر
بيوت العشق وعبايا
كِنّز دهب ونحاس
ماس في كل رملايه
——-
يا شرم الشيخ
شطّك خيال ومرايا
يحْضُنْ شمس النهار
لكن بالليل قمرايا
يا ارض الفيروز
روحي فداكي ودمايا
واشوف سانت كاترين
ع الجبين معلقه الرايا
فيها عيون موسى
حكمة رب ووصايا
——-
يا طور سيناء فيكِ بهاء
كليم الله
والسّحر في عصايا
وعبير هواكي
طريق للعيله وهدايه
——
سبناكي عروسه
بطرحه و م الفرحة
نازله دمعايه
تروي جزوع النخل
وأمل الضيّ شمعايه
قايده بدم شهيد
متغطي بشظايا
قلب امه انفطر
بتنادي يا ضنايا
——
أصحي يا زينة الملاح
مهرك دم وضحايا
عدوك يا ما قتل
أمل شباب وصبايا
صنع تعابين
قلوبها حجر
ناوية تقتل قمر
في أيده وردايه
ناويه لضيّ العلم
والألم يتكفنوا في رايه
يتكفنوا في رايه
تابعونا على صفحتنا الفيس بك
