رباعيـات ومـواويل
ذكر الحبيب المصطفى بيطمن القلب الحزين
بيشد ف خيوط الدفا ويطرد البرد اللعين
في يوم ميلاد النور غاب الضلام واختفى
وسيرته فيها الصفا ، بتهدي ف العاصيين
بحر المعاني اختلط ، هايج وزاد ف أساي
عقد الأصول اتفـرط ، والنور يعيش إزاي
من بين حروف الأمل طرحت شطوط المنى
وانا شعري طارح غنا ، مايلقش غير للناي
مشيك مع الكداب ، هايزيد في أوزارك
خلي الكلام بحساب لو شوفته أو زارك
واوعاك تلوم الزمن لو هاتجاريه ف الزور
بكره يجيك الدور ، ويذيع ف أسـرارك
ليلنا الطويل معتوه ، ومـش طالعله نهار
ولاأخ بينجد أخـوه ، ولاجار بيزور الجار
خنقنا خيط الضي مش لاقي طاقه يفوت
يونس لقاه الحوت ، وحـوتنا كـوم أوزار
الدنيا غابه وقست ، ومعادش فيها أصول
الطيبه بينا اتنست ، والود مش موصول
برد وســلام الـنار ، على إبراهيم نجاه
واحنا اللي سيبنا الآه ، تجرحنا زي الغـول
البحـر فيه الـدر ، والرزق ف السـموات
عقولنا صابها الضر ، عايشين لكن أموات
قفلـنا باب الرضـا ، وفتـحنا باب الطمع
مهما ابن آدم جمع ، يفضـل يقـولك هات
من أزمة المـواريث ، هديـنا ف الجـدران
إسأل هويس عتريس وادهم قتيل بدران
إنت اللي باني الدار ، للأخـره بعد الفنا
ياتعيش ماليك الهنا ، ياتبقى فيها مهان
أنا ابن فعل القدر ، وكلامي ع المكشوف
بين الصعاب والخطر ، فارد قلوع الشوف
باجمع أهات البشر ، واكتبها ف الدواوين
عشان ف يوم الدين تمحي الوجل والخوف
الـــود عــــندي دوا للـودادين باهـــديه
نمشي الخطاوي سوا ع السـكه ضد التيه
السـيره بين الـناس هـى الشرف والجاه
لو قلـبي ضل وتاه بالـقى الإلـه يهـديه
القلب نازف وجع ماعرفش كيف اداريه
مالقتش صاحب جدع حـس الألم وداريه
يطـرد عـزولي وانا ، اكسـر وراه القــلل
روحت لحكيم العلل قالي السبب ماداريه
داير غـراب الشـوم ، لـف الحواري ودار
عبى البناني هموم ، خوف حمامنا وطار
بعنا الهــديل للبـكا ، واتفــرقوا الولفين
ياصبر أخـرك فين ، وفين غناوي الدار
مش كل واحد وعـظ نبني عشـانه ضريح
ولا كل زول اتعظ ، وكان ف قوله صريح
ولا كل أخ إبتلى ، هيلاقي اخــوه وياه
ولا كـل قـولة آآآه ، هاتطيـب المجـاريح
مـش كل حد إختشى وكان خشاه لله
ولا كل واحد مشى ع السكه طاب ممشاه
ولا كل ظالم فجر ، هايحـس باللي انظلم
ولا كل صاحب قلم ، يدي الكـلام معناه
مش كل صاحب نصب ، صحبته هاتدوم
ولا كل ندل اتنصب ، تخفيه عمم وهدوم
ولا كل طاقة نور ، تهدي ضعـيف النظر
ولا ألف حيطه وحذر ، تمنع قدر محتوم
مش كل واحد حسد ، نقول عيونه وساع
ولا كل واحد عشق ، قلبه لحبيبه يساع
ولا كل حي ومات ، هايخش من غير كفن
ولا كل سـر اندفـن ، بين البـشر ينـذاع
مش كل واحد صدق ، وعاشها بالمعدول
ولا كل وعد اتوعد يوفيه جميل القول
ولا كل ظلم انتشر يقدر يدوس الحق
ولا كل توب اتشق يرمي العتب ع النول
النـدل إوعــى الـندل ، مهنــته نصــاب
لابـس قـناع العـدل ، وبـيزور الأنسـاب
لسـانه زي الشــهد ، ونـابه ناب كـوبرا
ولامنــه راح تـبرا ، لو سهـمه صــــاب
الحكمه م اللي انجـرح بناخدها للعبره
علشان يدوم الفرح ، وم الجـروح نبرا
فاوعى العويل يلسعك وتعودله من تاني
من كـدبه هاتعاني ، أسـتاذ ولـه خــبره
من خبرتي ف الحياه ماتقولش غير الحق
شوف اللي ضل وتاه ،مكروه مابين الخلق
فاوعاك تخـاف م الموت ، والكلمه تكتمها
للنـور وعمـمها ، لو شـقـوا صدرك شـق
إزاي تشيل همها ، ورب الخلايق حي
واوعاك تكون أبرهه ، تدبح خيوط الضي
بحق جاه المصطفى واللي اصطفاه تفضيل
طول م التابوت بيشيل ، لابد دورك جي
تابعونا علي صفحة الفيس بوك
