قالهالي
قالهالي في ودني
وانا نايم
إنت صلصال شغال عندي
أوعه تنسى
إنت صلصال شغال عندي
إفتكر دايماً
أنت صلصال شغال عندي
ما قالش غير كده
مش عارف مين
.صاحب الصوت
ولا فين كنت معاه
وسبني..؟
لكن وبكل صراحه
حسيت بالراحه
لما صحيت ولقيت
الشعر كتبني
قال إني
ولا مره بعت كلامه
ولا مره عاتبت آلامه
ولا مره نسيت …أقول
يارب إستخدمني
خليني تمللي على بابك
من بابك خايف
تحرمني
في سبيل الحق
ما أطاوعش الزيف
ولا احط رغيف
بين فمي
إلا لما أسمي
يارب
أنا مش درويش
أنا تابع تابع درويش
مكتوب لي أعيش
مع ضي الكلمه
الضي المسكون بهوايا
جوايا
يارب…
انا بزعل لما يقولوا
الشعر غوايه
مع إن مشاعري هدايه
وعيوني تمللي بتسرح
ف رحابك
بتقول الله جابك
علشان تزرع آيه
وتموت جملة ميكافيللي
الغايه تبرر الوسيله
تلاتين سنه وانا
بين الشعر وشعوري
ف قلب العتمه
أخترع نوري
وأقول يادمعه إمسحي
قلبي
بلوري
مراية بصيرتي
تلاتين سنه وحكاياتي
شاعر برَّوح ف عيوني
بعيوني
لعين الشمس
أنا الهمس.. اللي
مش عارف وصل …
ولا ما وصلش…؟
مس قلب الحجر…
ولا ما قدرش….؟
ما اعرفش
لسه الجمله شداني
ما فَرقتش
أنت صلصال شغال عندي
تبعونا على صفحته الفيس بوك
